main is hisar se niklun to aur kuchh sochun

maiñ is hisār se niklūñ to aur kuchh sochūñ

tumhāre pyaar se niklūñ to aur kuchh sochūñ

tirī galī ke alāva bhī aur qarye haiñ

jo is dayār se niklūñ to aur kuchh sochūñ

tumhāre hijr kī sadiyāñ tumhāre vasl ke din

maiñ is shumār se niklūñ to aur kuchh sochūñ

rachā huā hai tirā ishq merī poroñ meñ

maiñ is ḳhumār se niklūñ to aur kuchh sochūñ

ye merā jism ki mātam sarā.e hasrat hai

maiñ is mazār se niklūñ to aur kuchh sochūñ

ye mujh meñ kaun mire raat din sambhāltā hai

is iḳhtiyār se niklūñ to aur kuchh sochūñ

tumhāre jism kī ḳhushbū ne kar diyā mas.hūr

is ābshār se niklūñ to aur kuchh sochūñ

ye be-qarārī mirī ruuh kā ujālā hai

maiñ is qarār se niklūñ to aur kuchh sochūñ

main is hisar se niklun to aur kuchh sochun

tumhaare pyar se niklun to aur kuchh sochun

teri gali ke alawa bhi aur qarye hain

jo is dayar se niklun to aur kuchh sochun

tumhaare hijr ki sadiyan tumhaare wasl ke din

main is shumar se niklun to aur kuchh sochun

racha hua hai tera ishq meri poron mein

main is KHumar se niklun to aur kuchh sochun

ye mera jism ki matam sarae hasrat hai

main is mazar se niklun to aur kuchh sochun

ye mujh mein kaun mere raat din sambhaalta hai

is iKHtiyar se niklun to aur kuchh sochun

tumhaare jism ki KHushbu ne kar diya mashur

is aabshaar se niklun to aur kuchh sochun

ye be-qarari meri ruh ka ujala hai

main is qarar se niklun to aur kuchh sochun