main jab bhi koi achhuta kalam likhta hun

maiñ jab bhī koī achhūtā kalām likhtā huuñ

to pahle ek ġhazal tere naam likhtā huuñ

badan kī aañch se sañvlā ga.e haiñ pairāhan

maiñ phir bhī sub.h ke chehre pe shaam likhtā huuñ

chale to TūTeñ chaTTāneñ ruke to aag lage

shamīm-e-gul ko to nāzuk-ḳhirām likhtā huuñ

ghaTā.eñ jhuum ke barsīñ jhulas ga.ī khetī

ye hādsa hai ba-sad-e-ehtirām likhtā huuñ

zamīn pyāsī hai būḌhā gagan bhī bhūkā hai

maiñ apne ahd ke qisse tamām likhtā huuñ

chaman ko auroñ ne likkhā hai mai-kada bar dosh

maiñ phuul phuul ko ātish-ba-jām likhtā huuñ

na rābta na koī rabt hī rahā 'bekal'

us ajnabī ko magar maiñ salām likhtā huuñ

main jab bhi koi achhuta kalam likhta hun

to pahle ek ghazal tere nam likhta hun

badan ki aanch se sanwla gae hain pairahan

main phir bhi subh ke chehre pe sham likhta hun

chale to TuTen chaTTanen ruke to aag lage

shamim-e-gul ko to nazuk-KHiram likhta hun

ghaTaen jhum ke barsin jhulas gai kheti

ye hadsa hai ba-sad-e-ehtiram likhta hun

zamin pyasi hai buDha gagan bhi bhuka hai

main apne ahd ke qisse tamam likhta hun

chaman ko auron ne likkha hai mai-kada bar dosh

main phul phul ko aatish-ba-jam likhta hun

na rabta na koi rabt hi raha 'bekal'

us ajnabi ko magar main salam likhta hun