main jab bhi koi manzar dekhta hun

maiñ jab bhī koī manzar dekhtā huuñ

zarā auroñ se haT kar dekhtā huuñ

kabhī maiñ dekhtā huuñ us kī rahmat

kabhī maiñ apnī chādar dekhtā huuñ

nazar kā zāviya badlā hai jab se

maiñ kuuze meñ samundar dekhtā huuñ

kabhī mere liye the phuul jin meñ

ab un hāthoñ meñ patthar dekhtā huuñ

sabhī haiñ mubtalā-e-ḳhud-farebī

ajab duniyā kā manzar dekhtā huuñ

nahīñ badlāv ke āsār kuchh bhī

abhī hālāt abtar dekhtā huuñ

muqaddar meñ likhī vīrāniyoñ meñ

zarā sā rañg bhar kar dekhtā huuñ

nazar aatā hai madfan ḳhvāhishoñ kā

kabhī jab apne andar dekhtā huuñ

sunā hai aag hai us kā sarāpā

chalo bāhoñ meñ bhar kar dekhtā huuñ

basīrat mujh meñ hai 'nāyāb' aisī

maiñ har qatre meñ gauhar dekhtā huuñ

main jab bhi koi manzar dekhta hun

zara auron se haT kar dekhta hun

kabhi main dekhta hun us ki rahmat

kabhi main apni chadar dekhta hun

nazar ka zawiya badla hai jab se

main kuze mein samundar dekhta hun

kabhi mere liye the phul jin mein

ab un hathon mein patthar dekhta hun

sabhi hain mubtala-e-KHud-farebi

ajab duniya ka manzar dekhta hun

nahin badlaw ke aasar kuchh bhi

abhi haalat abtar dekhta hun

muqaddar mein likhi viraniyon mein

zara sa rang bhar kar dekhta hun

nazar aata hai madfan KHwahishon ka

kabhi jab apne andar dekhta hun

suna hai aag hai us ka sarapa

chalo bahon mein bhar kar dekhta hun

basirat mujh mein hai 'nayab' aisi

main har qatre mein gauhar dekhta hun