main jab pahle-pahal is shahr-e-na-pursan mein aaya tha

maiñ jab pahle-pahal is shahr-e-nā-pursāñ meñ aayā thā

sabhī apne nazar aate the lekin kaun apnā thā

hasīñ the duur hī se sāhil-o-dariyā ke nazzāre

magar jab Duub kar dekhā to sāhil thā na dariyā thā

use in fāsloñ kā kuchh na kuchh ehsās to hogā

kabhī jis shaḳhs ke siine meñ merā dil dhaḌaktā thā

simaT aayā ho jaise dard merā us ke lahje meñ

na jaane aaj kis aalam meñ us ne haal pūchhā thā

kahāñ tak dil meñ shahr-e-ārzū ābād rakhte ham

jab apne sāmne hadd-e-nazar tak ġham kā sahrā thā

jahāñ-bhar ko ḳhabar kaise huī tark-e-ta.alluq kī

mujhe tum se ta.alluq thā jahāñ se vāsta kyā thā

main jab pahle-pahal is shahr-e-na-pursan mein aaya tha

sabhi apne nazar aate the lekin kaun apna tha

hasin the dur hi se sahil-o-dariya ke nazzare

magar jab Dub kar dekha to sahil tha na dariya tha

use in faslon ka kuchh na kuchh ehsas to hoga

kabhi jis shaKHs ke sine mein mera dil dhaDakta tha

simaT aaya ho jaise dard mera us ke lahje mein

na jaane aaj kis aalam mein us ne haal puchha tha

kahan tak dil mein shahr-e-arzu aabaad rakhte hum

jab apne samne hadd-e-nazar tak gham ka sahra tha

jahan-bhar ko KHabar kaise hui tark-e-talluq ki

mujhe tum se talluq tha jahan se wasta kya tha