main jab wajud ke hairat-kade se mil raha tha

maiñ jab vajūd ke hairat-kade se mil rahā thā

mujhe lagā maiñ kisī mo.ajize se mil rahā thā

maiñ jāgtā thā ki jab log so chuke the tamām

charāġh mujh se mire tajrabe se mil rahā thā

havas se hotā huā aa gayā maiñ 'ishq kī samt

ye silsila bhī usī rāste se mil rahā thā

ḳhudā se pahlī mulāqāt ho rahī thī mirī

maiñ apne aap ko jab sāmne se mil rahā thā

‘ajīb lai thī jo tāsīr de rahī thī mujhe

‘ajīb lams thā har zāviye se mil rahā thā

maiñ us ke sīna-e-shaffāf kī harī lau se

dahak rahā thā so puure maze se mil rahā thā

savāb-o-tā.at-o-taqvā fazīlat-o-alqāb

paḌe hue the kahīñ maiñ nashe se mil rahā thā

tire jamāl kā bujhnā to lāzmī thā ki tū

baġhair 'ishq kiye aa.ine se mil rahā thā

zamīn bhī mire āġhosh-e-surḳh meñ thī 'alī'

falak bhī mujh se hare zā.iqe se mil rahā thā

main jab wajud ke hairat-kade se mil raha tha

mujhe laga main kisi moajize se mil raha tha

main jagta tha ki jab log so chuke the tamam

charagh mujh se mere tajrabe se mil raha tha

hawas se hota hua aa gaya main 'ishq ki samt

ye silsila bhi usi raste se mil raha tha

KHuda se pahli mulaqat ho rahi thi meri

main apne aap ko jab samne se mil raha tha

‘ajib lai thi jo tasir de rahi thi mujhe

‘ajib lams tha har zawiye se mil raha tha

main us ke sina-e-shaffaf ki hari lau se

dahak raha tha so pure maze se mil raha tha

sawab-o-taat-o-taqwa fazilat-o-alqab

paDe hue the kahin main nashe se mil raha tha

tere jamal ka bujhna to lazmi tha ki tu

baghair 'ishq kiye aaine se mil raha tha

zamin bhi mere aaghosh-e-surKH mein thi 'ali'

falak bhi mujh se hare zaiqe se mil raha tha