main jite-ji talak rahun marhun aap ka

maiñ jīte-jī talak rahūñ marhūn aap kā

gar aaj qasd kījiye mujh se milāp kā

maiñ ye samajh ke dauḌūñ huuñ aayā vo shahsavār

khaTkā sunūñ huuñ jab kisī ghoḌe kī Top kā

tum gaao apne raag ko us paas vā.izo

mushtāq jo gadhā ho tumhāre alaap kā

go duḳht-e-raz se milne meñ bad Thahre mohtasib

denā nahīñ dharāne meñ ham us ke baap kā

dukh meñ nahīñ hai koī kisū kā sharīk-e-hāl

yaañ khel mach rahā hai ajab āp-dhāp kā

thapvā.īñ un kī maaTī kī īñTeñ falak ne haif

thā shor jin ke mahloñ meñ table kī thaap kā

aurāq-e-ganjifa kaho asnāf-e-ḳhalq ko

hai shauq un ke dil meñ sadā Tīp-Tāp kā

kis tarah ham se bose kā va.ada kare vo shoḳh

najrī raqīb se hai Darā muñh kī bhaap kā

kiijo 'muhib' nigāh ye chhāpa hai aur hī

ganda kare hai dil ko nagīñ us kī chhāp kā

main jite-ji talak rahun marhun aap ka

gar aaj qasd kijiye mujh se milap ka

main ye samajh ke dauDun hun aaya wo shahsawar

khaTka sunun hun jab kisi ghoDe ki Top ka

tum gao apne rag ko us pas waizo

mushtaq jo gadha ho tumhaare alap ka

go duKHt-e-raz se milne mein bad Thahre mohtasib

dena nahin dharane mein hum us ke bap ka

dukh mein nahin hai koi kisu ka sharik-e-haal

yan khel mach raha hai ajab aap-dhap ka

thapwain un ki maTi ki inTen falak ne haif

tha shor jin ke mahlon mein table ki thap ka

auraq-e-ganjifa kaho asnaf-e-KHalq ko

hai shauq un ke dil mein sada Tip-Tap ka

kis tarah hum se bose ka wada kare wo shoKH

najri raqib se hai Dara munh ki bhap ka

kijo 'muhib' nigah ye chhapa hai aur hi

ganda kare hai dil ko nagin us ki chhap ka