main jo sahra mein kisi peD ka saya hota

maiñ jo sahrā meñ kisī peḌ kā saayā hotā

dil-zada koī ghaḌī bhar ko to Thahrā hotā

ab to vo shāḳh bhī shāyad hī gulistāñ meñ mile

kaash is phuul ko us vaqt hī toḌā hotā

vaqt fursat nahīñ degā hameñ muḌne kī kabhī

aage baḌhte hue ham ne jo ye sochā hotā

hañste hañste jo hameñ chhoḌ gayā hai hairāñ

ab rulāne ke liye yaad na aayā hotā

vaqt-e-ruḳhsat bhī nirālī hī rahī dhaj terī

jaate jaate zarā muḌ ke bhī to dekhā hotā

kis se pūchheñ ki vahāñ kaisī guzar hotī hai

dost apnā kabhī ahvāl hī likkhā hotā

aisā lagtā hai ki bas ḳhvāb se jaagā huuñ abhī

sochtā huuñ ki jo ye ḳhvāb na TuuTā hotā

zindagī phir bhī thī dushvār bahut hī dushvār

har qadam saath agar ek masīhā hotā

ek mahfil hai ki din raat bapā rahtī hai

chand lamhoñ ke liye kaash maiñ tanhā hotā

main jo sahra mein kisi peD ka saya hota

dil-zada koi ghaDi bhar ko to Thahra hota

ab to wo shaKH bhi shayad hi gulistan mein mile

kash is phul ko us waqt hi toDa hota

waqt fursat nahin dega hamein muDne ki kabhi

aage baDhte hue hum ne jo ye socha hota

hanste hanste jo hamein chhoD gaya hai hairan

ab rulane ke liye yaad na aaya hota

waqt-e-ruKHsat bhi nirali hi rahi dhaj teri

jate jate zara muD ke bhi to dekha hota

kis se puchhen ki wahan kaisi guzar hoti hai

dost apna kabhi ahwal hi likkha hota

aisa lagta hai ki bas KHwab se jaga hun abhi

sochta hun ki jo ye KHwab na TuTa hota

zindagi phir bhi thi dushwar bahut hi dushwar

har qadam sath agar ek masiha hota

ek mahfil hai ki din raat bapa rahti hai

chand lamhon ke liye kash main tanha hota