main kar-amad hun ya be-kar hun main

maiñ kār-āmad huuñ yā be-kār huuñ maiñ

magar ai yaar terā yaar huuñ maiñ

jo dekhā hai kisī ko mat batānā

ilāqe bhar meñ izzat-dār huuñ maiñ

ḳhud apnī zaat ke sarmā.e meñ bhī

sifar fīsad kā hisse-dār huuñ maiñ

aur ab kyuuñ bain karte aa ga.e hoñ

kahā thā nā bahut bīmār huuñ maiñ

mirī to saarī duniyā bas tumhī ho

ġhalat kyā hai jo duniyā-dār huuñ maiñ

kahānī meñ jo hotā hī nahīñ hai

kahānī kā vahī kirdār huuñ maiñ

ye tai kartā hai dastak dene vaalā

kahāñ dar huuñ kahāñ dīvār huuñ maiñ

koī samjhā.e mere dushmanoñ ko

zarā sī dostī kī maar huuñ maiñ

mujhe patthar samajh kar pesh mat aa

zarā sā rahm kar jāñ-dār huuñ maiñ

bas itnā soch kar kiije koī hukm

baḌā muñh-zor ḳhidmat-gār huuñ maiñ

koī shak hai to be-shak aazmā le

tirā hone kā da.ave-dār huuñ maiñ

agar har haal meñ ḳhush rahnā fan hai

to phir sab se baḌā fankār huuñ maiñ

zamāna to mujhe kahtā hai 'fāris'

magar 'fāris' kā parda-dār huuñ maiñ

unheñ khilnā sikhātā huuñ maiñ 'fāris'

gulāboñ kā suhūlat-kār huuñ maiñ

main kar-amad hun ya be-kar hun main

magar ai yar tera yar hun main

jo dekha hai kisi ko mat batana

ilaqe bhar mein izzat-dar hun main

KHud apni zat ke sarmae mein bhi

sifar fisad ka hisse-dar hun main

aur ab kyun bain karte aa gae hon

kaha tha na bahut bimar hun main

meri to sari duniya bas tumhi ho

ghalat kya hai jo duniya-dar hun main

kahani mein jo hota hi nahin hai

kahani ka wahi kirdar hun main

ye tai karta hai dastak dene wala

kahan dar hun kahan diwar hun main

koi samjhae mere dushmanon ko

zara si dosti ki mar hun main

mujhe patthar samajh kar pesh mat aa

zara sa rahm kar jaan-dar hun main

bas itna soch kar kije koi hukm

baDa munh-zor KHidmat-gar hun main

koi shak hai to be-shak aazma le

tera hone ka dawe-dar hun main

agar har haal mein KHush rahna fan hai

to phir sab se baDa fankar hun main

zamana to mujhe kahta hai 'faris'

magar 'faris' ka parda-dar hun main

unhen khilna sikhata hun main 'faris'

gulabon ka suhulat-kar hun main