main KHak chhanta hun aaftab dekhta hun

maiñ ḳhaak chhāntā huuñ āftāb dekhtā huuñ

harīm-e-dasht meñ ḳhushbū ke ḳhvāb dekhtā huuñ

hisār-e-ġhair meñ rahtā hai ye makān-e-vajūd

maiñ ḳhalvatoñ meñ bhī aksar 'azāb dekhtā huuñ

ye kyā ki ahd-e-bahārāñ meñ har shajar be-barg

ye kyā ki fasl-e-ḳhizāñ meñ gulāb dekhtā huuñ

mire ḳhayāl meñ khilne lage haiñ zaḳhm-e-firāq

tumhāre lutf-o-karam kā hisāb dekhtā huuñ

varaq varaq pe tire ḳhāl-o-ḳhad haiñ aks-fagan

hujūm-e-yās meñ dil kī kitāb dekhtā huuñ

ye be-sabab to nahīñ gard-e-rahguzar 'nāshād'

talāsh-e-āb-e-ravāñ meñ sarāb dekhtā huuñ

main KHak chhanta hun aaftab dekhta hun

harim-e-dasht mein KHushbu ke KHwab dekhta hun

hisar-e-ghair mein rahta hai ye makan-e-wajud

main KHalwaton mein bhi aksar 'azab dekhta hun

ye kya ki ahd-e-bahaaran mein har shajar be-barg

ye kya ki fasl-e-KHizan mein gulab dekhta hun

mere KHayal mein khilne lage hain zaKHm-e-firaq

tumhaare lutf-o-karam ka hisab dekhta hun

waraq waraq pe tere KHal-o-KHad hain aks-fagan

hujum-e-yas mein dil ki kitab dekhta hun

ye be-sabab to nahin gard-e-rahguzar 'nashad'

talash-e-ab-e-rawan mein sarab dekhta hun