main KHud hi KHugar-e-KHalish-e-justuju na tha

maiñ ḳhud hī ḳhūgar-e-ḳhalish-e-justujū na thā

dushvār varna marhala-e-ārzū na thā

nāhaq ḳharāb-e-minnat-e-darmāñ huā na dard

mamnūn-e-zaḳhm huuñ ki maqām-e-rafū na thā

yā āshna-e-ramz talab hī na thī zabāñ

lab vā hue to hausla-e-guftagū na thā

nā-pursish-e-vafā kī ye naubat kabhī na thī

dil yuuñ sulūk-e-ahl-e-karam se lahū na thā

haañ kab ba-nām-e-ishq havas surḳh-rū na thī

haañ kab niyāz-e-shauq subuk kū-ba-kū na thā

ḳhush-fahmī-e-ḳhayāl kī ab zid kā kyā ilaaj

varna jo shaam paas se guzrā thā tū na thā

'gauhar' ġhazal se dhul to gayā kuchh ġhubār-e-ġham

har chand ye hunar sabab-e-ābrū na thā

main KHud hi KHugar-e-KHalish-e-justuju na tha

dushwar warna marhala-e-arzu na tha

nahaq KHarab-e-minnat-e-darman hua na dard

mamnun-e-zaKHm hun ki maqam-e-rafu na tha

ya aashna-e-ramz talab hi na thi zaban

lab wa hue to hausla-e-guftagu na tha

na-pursish-e-wafa ki ye naubat kabhi na thi

dil yun suluk-e-ahl-e-karam se lahu na tha

han kab ba-nam-e-ishq hawas surKH-ru na thi

han kab niyaz-e-shauq subuk ku-ba-ku na tha

KHush-fahmi-e-KHayal ki ab zid ka kya ilaj

warna jo sham pas se guzra tha tu na tha

'gauhar' ghazal se dhul to gaya kuchh ghubar-e-gham

har chand ye hunar sabab-e-abru na tha