main ki KHush hota tha dariya ki rawani dekh kar

maiñ ki ḳhush hotā thā dariyā kī ravānī dekh kar

kaañp uTThā huuñ galī-kūchoñ meñ paanī dekh kar

ho koī bahrūp us kā dil dhaḌaktā hai zarūr

maiñ use pahchān letā huuñ nishānī dekh kar

adh-khule tanhā darīchoñ kā mujhe aayā ḳhayāl

nīm-vā āñkhoñ kī rañgat āsmānī dekh kar

abr ke TukḌoñ ne dīvāreñ banā diiñ jā-ba-jā

dhuup se jaltī fazā kī be-karānī dekh kar

ek lamhe meñ kaTā hai muddatoñ kā fāsla

maiñ abhī aayā huuñ tasvīreñ purānī dekh kar

aañkh ke bādal se kahtā hai ki duniyā par baras

dil lab o ruḳhsār kī sho.ala-fishānī dekh kar

kis taraf le jā.egī so.e hue logoñ ko raat

Dar rahā huuñ us kī āñkhoñ meñ girānī dekh kar

din vahīñ par kāTnā ham ko qayāmat ho gayā

aan baiThe the jahāñ sub.heñ suhānī dekh kar

dil meñ jo kuchh hai zabāñ kā zā.iqa bantā nahīñ

lafz chehra Dhāñp lete haiñ ma.ānī dekh kar

dil na jaane kaun sī gahrā.iyoñ meñ kho gayā

bahr kī maujoñ kī tahrīroñ ko faanī dekh kar

der se 'shahzād' kunj-e-āfiyat meñ the asiir

ḳhush huā hai dil balā-e-nā-gahānī dekh kar

main ki KHush hota tha dariya ki rawani dekh kar

kanp uTTha hun gali-kuchon mein pani dekh kar

ho koi bahrup us ka dil dhaDakta hai zarur

main use pahchan leta hun nishani dekh kar

adh-khule tanha darichon ka mujhe aaya KHayal

nim-wa aankhon ki rangat aasmani dekh kar

abr ke TukDon ne diwaren bana din ja-ba-ja

dhup se jalti faza ki be-karani dekh kar

ek lamhe mein kaTa hai muddaton ka fasla

main abhi aaya hun taswiren purani dekh kar

aankh ke baadal se kahta hai ki duniya par baras

dil lab o ruKHsar ki shoala-fishani dekh kar

kis taraf le jaegi soe hue logon ko raat

Dar raha hun us ki aankhon mein girani dekh kar

din wahin par kaTna hum ko qayamat ho gaya

aan baiThe the jahan subhen suhani dekh kar

dil mein jo kuchh hai zaban ka zaiqa banta nahin

lafz chehra Dhanp lete hain maani dekh kar

dil na jaane kaun si gahraiyon mein kho gaya

bahr ki maujon ki tahriron ko fani dekh kar

der se 'shahzad' kunj-e-afiyat mein the asir

KHush hua hai dil bala-e-na-gahani dekh kar