main lakh kah dun ki aakash hun zamin hun main

maiñ laakh kah duuñ ki ākāsh huuñ zamīñ huuñ maiñ

magar use to ḳhabar hai ki kuchh nahīñ huuñ maiñ

ajiib log haiñ merī talāsh meñ mujh ko

vahāñ pe DhūñD rahe haiñ jahāñ nahīñ huuñ maiñ

maiñ ā.inoñ se to māyūs lauT aayā thā

magar kisī ne batāyā bahut hasīñ huuñ maiñ

vo zarre zarre meñ maujūd hai magar maiñ bhī

kahīñ kahīñ huuñ kahāñ huuñ kahīñ nahīñ huuñ maiñ

vo ik kitāb jo mansūb tere naam se hai

usī kitāb ke andar kahīñ kahīñ huuñ maiñ

sitāro aao mirī raah meñ bikhar jaao

ye merā hukm hai hālāñki kuchh nahīñ huuñ maiñ

yahīñ husain bhī guzre yahīñ yazīd bhī thā

hazār rañg meñ Duubī huī zamīñ huuñ maiñ

ye būḌhī qabreñ tumheñ kuchh nahīñ batā.eñgī

mujhe talāsh karo dosto yahīñ huuñ maiñ

main lakh kah dun ki aakash hun zamin hun main

magar use to KHabar hai ki kuchh nahin hun main

ajib log hain meri talash mein mujh ko

wahan pe DhunD rahe hain jahan nahin hun main

main aainon se to mayus lauT aaya tha

magar kisi ne bataya bahut hasin hun main

wo zarre zarre mein maujud hai magar main bhi

kahin kahin hun kahan hun kahin nahin hun main

wo ek kitab jo mansub tere nam se hai

usi kitab ke andar kahin kahin hun main

sitaro aao meri rah mein bikhar jao

ye mera hukm hai haalanki kuchh nahin hun main

yahin husain bhi guzre yahin yazid bhi tha

hazar rang mein Dubi hui zamin hun main

ye buDhi qabren tumhein kuchh nahin bataengi

mujhe talash karo dosto yahin hun main