main na Thahrun na jaan tu Thahre

maiñ na Thahrūñ na jaan tū Thahre

kaun lamhoñ ke rū-ba-rū Thahre

na guzarne pe zindagī guzrī

na Thaharne pe chār-sū Thahre

hai mirī bazm-e-be-dilī bhī ajiib

dil pe rakkhūñ jahāñ subū Thahre

maiñ yahāñ muddatoñ meñ aayā huuñ

ek hañgāma kū-ba-kū Thahre

mahfil-e-ruḳhsat-e-hamesha hai

aao ik hashr-e-hā-o-hū Thahre

ik tavajjoh ajab hai samtoñ meñ

ki na bolūñ to guftugū Thahre

kaj-adā thī bahut umiid magar

ham bhī 'jaun' ek hīla-jū Thahre

ek chāk-e-barhñgī hai vajūd

pairahan ho to be-rafū Thahre

maiñ jo huuñ kyā nahīñ huuñ maiñ ḳhud bhī

ḳhud se baat aaj dū-badū Thahre

bāġh-e-jāñ se milā na koī samar

'jaun' ham to numū numū Thahre

main na Thahrun na jaan tu Thahre

kaun lamhon ke ru-ba-ru Thahre

na guzarne pe zindagi guzri

na Thaharne pe chaar-su Thahre

hai meri bazm-e-be-dili bhi ajib

dil pe rakkhun jahan subu Thahre

main yahan muddaton mein aaya hun

ek hangama ku-ba-ku Thahre

mahfil-e-ruKHsat-e-hamesha hai

aao ek hashr-e-ha-o-hu Thahre

ek tawajjoh ajab hai samton mein

ki na bolun to guftugu Thahre

kaj-ada thi bahut umid magar

hum bhi 'jaun' ek hila-ju Thahre

ek chaak-e-barhngi hai wajud

pairahan ho to be-rafu Thahre

main jo hun kya nahin hun main KHud bhi

KHud se baat aaj du-badu Thahre

bagh-e-jaan se mila na koi samar

'jaun' hum to numu numu Thahre