maine jab tab jidhar jidhar dekha

maiñ ne jab tab jidhar jidhar dekhā

apnī sūrat kā hī bashar dekhā

ret meñ dafn the makān jahāñ

un pe miTTī kā bhī asar dekhā

jab sukūnat thī merī barzaḳh meñ

nek rūhoñ kā ik nagar dekhā

jo barahna mudām rahtā thā

maiñ ne malbūs vo shajar dekhā

apne maslak pe gāmzan thā jab

raushnī ko bhī ham-safar dekhā

mujh pe thā har vajūd kā saaya

dhuup ko jab barahna-sar dekhā

mujh ko ehsās bartarī kā huā

rif.atoñ ko jab ik nazar dekhā

jis kī tauhīn kī sitāroñ ne

maiñ ne aisā bhī ik qamar dekhā

us ke ruḳh par mirā hī partav thā

maiñ ne jis ko bhī ik nazar dekhā

us kī rūdād buum se pūchho

jo bhī kuchh us ne rāt-bhar dekhā

merī chiḌiyoñ se thī rifāqat kyā

saaf suthrā jo apnā ghar dekhā

dekhnā thā ki dev sā bhī huuñ

chaḌh ke kandhoñ pe apnā sar dekhā

aatmā se jo rābta thā mirā

zaat apnī meñ īshvar dekhā

bahr-o-bar se vo muḳhtalif thā 'figār'

maiñ ne manzar jo auj par dekhā

main ne jab tab jidhar jidhar dekha

apni surat ka hi bashar dekha

ret mein dafn the makan jahan

un pe miTTi ka bhi asar dekha

jab sukunat thi meri barzaKH mein

nek ruhon ka ek nagar dekha

jo barahna mudam rahta tha

main ne malbus wo shajar dekha

apne maslak pe gamzan tha jab

raushni ko bhi ham-safar dekha

mujh pe tha har wajud ka saya

dhup ko jab barahna-sar dekha

mujh ko ehsas bartari ka hua

rifaton ko jab ek nazar dekha

jis ki tauhin ki sitaron ne

main ne aisa bhi ek qamar dekha

us ke ruKH par mera hi partaw tha

main ne jis ko bhi ek nazar dekha

us ki rudad bum se puchho

jo bhi kuchh us ne raat-bhar dekha

meri chiDiyon se thi rifaqat kya

saf suthra jo apna ghar dekha

dekhna tha ki dew sa bhi hun

chaDh ke kandhon pe apna sar dekha

aatma se jo rabta tha mera

zat apni mein ishwar dekha

bahr-o-bar se wo muKHtalif tha 'figar'

main ne manzar jo auj par dekha