maine jo kuchh kho diya ab isko pa sakta nahin

maiñ ne jo kuchh kho diyā ab is ko pā saktā nahīñ

dil se ye ehsās bhī lekin miTā saktā nahīñ

vo kanār-e-āb baiThe chāñd ugte dekhnā

jhiil kī tah se vo manzar ab ugā saktā nahīñ

sab dar-o-dīvār us ke lams ke maqrūz haiñ

apne ghar se us kī tasvīreñ miTā saktā nahīñ

mat milo is se tumhārī baat maiñ ne maan lī

us ke ġham meñ chaar aañsū bhī bahā saktā nahīñ

shahr-bhar meñ phuul kī chādar bichhānā hai mujhe

apne shahzādoñ ko kāñToñ par chalā saktā nahīñ

kuchh banānā chāhtā huuñ aur ban jaatā hai kuchh

maiñ ḳhud apne ghar ko naqshe se milā saktā nahīñ

main ne jo kuchh kho diya ab is ko pa sakta nahin

dil se ye ehsas bhi lekin miTa sakta nahin

wo kanar-e-ab baiThe chand ugte dekhna

jhil ki tah se wo manzar ab uga sakta nahin

sab dar-o-diwar us ke lams ke maqruz hain

apne ghar se us ki taswiren miTa sakta nahin

mat milo is se tumhaari baat main ne man li

us ke gham mein chaar aansu bhi baha sakta nahin

shahr-bhar mein phul ki chadar bichhana hai mujhe

apne shahzadon ko kanTon par chala sakta nahin

kuchh banana chahta hun aur ban jata hai kuchh

main KHud apne ghar ko naqshe se mila sakta nahin