maine kal KHwab mein aainda ko chalte dekha

maiñ ne kal ḳhvāb meñ ā.inda ko chalte dekhā

rizq aur ishq ko ik ghar se nikalte dekhā

raushnī DhūñD ke laanā koī mushkil to na thā

lekin is dauḌ meñ har shaḳhs ko jalte dekhā

ek ḳhush-fahm ko rote hue dekhā maiñ ne

ek be-rahm ko andar se pighalte dekhā

roz palkoñ pe ga.ī raat ko raushan rakkhā

roz āñkhoñ meñ ga.e din ko machalte dekhā

sub.h ko tañg kiyā ḳhud pe zarūrat kā hisār

shaam ko phir isī mushkil se nikalte dekhā

ek hī samt meñ kab tak koī chal saktā hai

haañ kisī ne mujhe rasta na badalte dekhā

'azm' is shahr meñ ab aisī koī aañkh nahīñ

girne vaale ko yahāñ jis ne sambhalte dekhā

main ne kal KHwab mein aainda ko chalte dekha

rizq aur ishq ko ek ghar se nikalte dekha

raushni DhunD ke lana koi mushkil to na tha

lekin is dauD mein har shaKHs ko jalte dekha

ek KHush-fahm ko rote hue dekha main ne

ek be-rahm ko andar se pighalte dekha

roz palkon pe gai raat ko raushan rakkha

roz aankhon mein gae din ko machalte dekha

subh ko tang kiya KHud pe zarurat ka hisar

sham ko phir isi mushkil se nikalte dekha

ek hi samt mein kab tak koi chal sakta hai

han kisi ne mujhe rasta na badalte dekha

'azm' is shahr mein ab aisi koi aankh nahin

girne wale ko yahan jis ne sambhalte dekha