maine wo nazm likhi hai ki KHuda jaanta hai

maiñ ne vo nazm likhī hai ki ḳhudā jāntā hai

us kā har lafz ḳhudā.ī kā patā jāntā hai

merī āñkhoñ meñ ye tasvīr zarā ġhaur se dekh

mujh ko us shaḳhs se milnā hai batā jāntā hai

maiñ bhī zanjīr nahīñ hotā kisī vahshat se

vo bhī tanhā.ī se bachne kī duā jāntā hai

din to maiñ phir bhī kisī Dhab se bitā letā huuñ

raat jo mujh pe guzartī hai ḳhudā jāntā hai

merī sūrat ye dikhā.e bhī to kaise mujh ko

mere baare meñ ye ā.īna bhī kyā jāntā hai

mere kashkol ko bhar de ki maiñ ḳhālī huuñ bahut

tujh sivā kaun saḳhī merā patā jāntā hai

dil ke baare meñ maiñ tafsīl batā.ūñ tumheñ kyā

muḳhtasar ye ki mohabbat ko sazā jāntā hai

mas.ala ye hai ki maiñ ḳhush huuñ akelā ho kar

is qadar ḳhush ki faqat merā ḳhudā jāntā hai

zindagī khel hai shatranj se bhī pechīda

jānñe vaalā bhī is baab meñ kyā jāntā hai

harf ko harf batātā hai vo ḳhāmosh dahan

saut ko saut samajhtā hai sadā jāntā hai

'mīr' kī mujh ko sanad de to maiñ sochūñ is par

nāravā harf ko jo harf-e-ravā jāntā hai

dil dhaḌakne kī bhī āvāz nahīñ aatī 'zeb'

aisī ḳhāmoshī ko tū kaise sadā jāntā hai

main ne wo nazm likhi hai ki KHuda jaanta hai

us ka har lafz KHudai ka pata jaanta hai

meri aankhon mein ye taswir zara ghaur se dekh

mujh ko us shaKHs se milna hai bata jaanta hai

main bhi zanjir nahin hota kisi wahshat se

wo bhi tanhai se bachne ki dua jaanta hai

din to main phir bhi kisi Dhab se bita leta hun

raat jo mujh pe guzarti hai KHuda jaanta hai

meri surat ye dikhae bhi to kaise mujh ko

mere bare mein ye aaina bhi kya jaanta hai

mere kashkol ko bhar de ki main KHali hun bahut

tujh siwa kaun saKHi mera pata jaanta hai

dil ke bare mein main tafsil bataun tumhein kya

muKHtasar ye ki mohabbat ko saza jaanta hai

masala ye hai ki main KHush hun akela ho kar

is qadar KHush ki faqat mera KHuda jaanta hai

zindagi khel hai shatranj se bhi pechida

jaanne wala bhi is bab mein kya jaanta hai

harf ko harf batata hai wo KHamosh dahan

saut ko saut samajhta hai sada jaanta hai

'mir' ki mujh ko sanad de to main sochun is par

narawa harf ko jo harf-e-rawa jaanta hai

dil dhaDakne ki bhi aawaz nahin aati 'zeb'

aisi KHamoshi ko tu kaise sada jaanta hai