maine ye kab kaha hai ki wo mujhko tanha nahin chhoDta

maiñ ne ye kab kahā hai ki vo mujh ko tanhā nahīñ chhoḌtā

chhoḌtā hai magar ek din se ziyāda nahīñ chhoḌtā

kaun sahrāoñ kī pyaas hai in makānoñ kī buniyād meñ

bārishoñ se agar bach bhī jaa.eñ to dariyā nahīñ chhoḌtā

duur ummīd kī khiḌkiyoñ se koī jhāñktā hai yahāñ

aur mere galī chhoḌne tak darīcha nahīñ chhoḌtā

maiñ jise chhoḌ kar tum se chhup kar milā huuñ agar aaj vo

dekh letā to shāyad vo donoñ ko zinda nahīñ chhoḌtā

kaun-o-imakān meñ do tarah ke hī to sho.abada-bāz haiñ

ek parda girātā hai aur ek parda nahīñ chhoḌtā

sach kahūñ merī qurbat to ḳhud us kī sāñsoñ kā vardān hai

maiñ jise chhoḌ detā huuñ us ko qabīla nahīñ chhoḌtā

tai-shuda vaqt par vo pahuñch jaatā hai pyaar karne vasūl

jis tarah apnā qarza kabhī koī baniyā nahīñ chhoḌtā

pahle mujh par bahut bhauñktā hai ki maiñ ajnabī huuñ koī

aur agar ghar se jaane kā bolūñ to kurtā nahīñ chhoḌtā

log kahte haiñ tahzīb 'hāfī' use chhoḌ kar Thiik hai

hijr itnā hī āsān hotā to tauñsa nahīñ chhoḌtā

main ne ye kab kaha hai ki wo mujh ko tanha nahin chhoDta

chhoDta hai magar ek din se ziyaada nahin chhoDta

kaun sahraon ki pyas hai in makanon ki buniyaad mein

barishon se agar bach bhi jaen to dariya nahin chhoDta

dur ummid ki khiDkiyon se koi jhankta hai yahan

aur mere gali chhoDne tak daricha nahin chhoDta

main jise chhoD kar tum se chhup kar mila hun agar aaj wo

dekh leta to shayad wo donon ko zinda nahin chhoDta

kaun-o-imakan mein do tarah ke hi to shoabada-baz hain

ek parda giraata hai aur ek parda nahin chhoDta

sach kahun meri qurbat to KHud us ki sanson ka wardan hai

main jise chhoD deta hun us ko qabila nahin chhoDta

tai-shuda waqt par wo pahunch jata hai pyar karne wasul

jis tarah apna qarza kabhi koi baniya nahin chhoDta

pahle mujh par bahut bhaunkta hai ki main ajnabi hun koi

aur agar ghar se jaane ka bolun to kurta nahin chhoDta

log kahte hain tahzib 'hafi' use chhoD kar Thik hai

hijr itna hi aasan hota to taunsa nahin chhoDta