main pasban-e-bagh-e-haqiqat se Dar gaya

maiñ pāsbān-e-bāġh-e-haqīqat se Dar gayā

so dasht-e-dil kī ḳhaak uḌāne se mar gayā

bahtā rahā maiñ sāhil-e-duniyā kī ret par

āḳhir badan kī ḳhaak sameTī to ghar gayā

kuchh to mire suḳhan kī harārat se khil uThā

kuchh maiñ tire jamāl ke sadqe sañvar gayā

pahle to ḳhair dil meñ tirī gard-e-yād thī

par ab to vo ġhubār bhī dil se utar gayā

āvāz de rahe haiñ mujhe vahshiyān-e-shahr

aur bain kar rahe haiñ ki 'fahmī' kidhar gayā

main pasban-e-bagh-e-haqiqat se Dar gaya

so dasht-e-dil ki KHak uDane se mar gaya

bahta raha main sahil-e-duniya ki ret par

aaKHir badan ki KHak sameTi to ghar gaya

kuchh to mere suKHan ki hararat se khil uTha

kuchh main tere jamal ke sadqe sanwar gaya

pahle to KHair dil mein teri gard-e-yaad thi

par ab to wo ghubar bhi dil se utar gaya

aawaz de rahe hain mujhe wahshiyan-e-shahr

aur bain kar rahe hain ki 'fahmi' kidhar gaya