main phir se ho jaunga tanha ek din

maiñ phir se ho jā.ūñgā tanhā ik din

bain karegā ruuh kā sannāTā ik din

jin meñ abhī ik vahshī aag ke saa.e haiñ

vo āñkheñ ho jā.eñgī sahrā ik din

biit chukā hogā ye ḳhvāboñ kā mausam

band milegā niiñd kā darvāza ik din

miT jā.egā sehr tumhārī āñkhoñ kā

apne paas bulā legī duniyā ik din

Duub rahā huuñ jhuuT aur khoT ke dariyā meñ

jaane kahāñ le jaa.e ye dariyā ik din

maiñ bhī luuT ā.ūñgā apne ta.āqub se

tum bhī mujh ko DhūñDh ke thak jaanā ik din

main phir se ho jaunga tanha ek din

bain karega ruh ka sannaTa ek din

jin mein abhi ek wahshi aag ke sae hain

wo aankhen ho jaengi sahra ek din

bit chuka hoga ye KHwabon ka mausam

band milega nind ka darwaza ek din

miT jaega sehr tumhaari aankhon ka

apne pas bula legi duniya ek din

Dub raha hun jhuT aur khoT ke dariya mein

jaane kahan le jae ye dariya ek din

main bhi luT aaunga apne taaqub se

tum bhi mujh ko DhunDh ke thak jaana ek din