میں راہ دار و رسن سے گزر گیا کیسے

میں راہ دار و رسن سے گزر گیا کیسے

قبول مسلک منصور کر گیا کیسے

تمام رات جو لڑتا رہا اندھیروں سے

سحر کی پہلی کرن سے وہ ڈر گیا کیسے

وہ شیشہ‌ خو تھا نہ شیشہ بدن نہ شیشہ خیال

تو ٹوٹ پھوٹ کے آخر بکھر گیا کیسے

چمک رہا تھا جو شفاف جھیل کی مانند

وہ آج اندھے کنویں میں اتر گیا کیسے

ابھر سکا نہ کبھی بحر غم میں جو ڈوبا

ہوں میں غریق تعجب ابھر گیا کیسے

ہوا ہے شہر میں کیا کوئی سانحہ فردوسؔ

تمہارا چہرہ اچانک اتر گیا کیسے