main ro ke aah karunga jahan rahe na rahe

maiñ ro ke aah karūñgā jahāñ rahe na rahe

zamīñ rahe na rahe āsmāñ rahe na rahe

rahe vo jān-e-jahāñ ye jahāñ rahe na rahe

makīñ kī ḳhair ho yā rab makāñ rahe na rahe

abhī mazār par ahbāb fātiha paḌh leñ

phir is qadar bhī hamārā nishāñ rahe na rahe

ḳhudā ke vāste kalma butoñ kā paḌh zāhid

phir iḳhtiyār meñ ġhāfil zabāñ rahe na rahe

ḳhizāñ to ḳhair se guzrī chaman meñ bulbul kī

bahār aa.ī hai ab āshiyāñ rahe na rahe

chalā to huuñ pa.e iz.hār-e-dard-e-dil dekhūñ

huzūr-e-yār majāl-e-bayāñ rahe na rahe

'amīr' jamā haiñ ahbāb dard-e-dil kah le

phir iltifāt-e-dil-e-dostāñ rahe na rahe

main ro ke aah karunga jahan rahe na rahe

zamin rahe na rahe aasman rahe na rahe

rahe wo jaan-e-jahan ye jahan rahe na rahe

makin ki KHair ho ya rab makan rahe na rahe

abhi mazar par ahbab fatiha paDh len

phir is qadar bhi hamara nishan rahe na rahe

KHuda ke waste kalma buton ka paDh zahid

phir iKHtiyar mein ghafil zaban rahe na rahe

KHizan to KHair se guzri chaman mein bulbul ki

bahaar aai hai ab aashiyan rahe na rahe

chala to hun pae izhaar-e-dard-e-dil dekhun

huzur-e-yar majal-e-bayan rahe na rahe

'amir' jama hain ahbab dard-e-dil kah le

phir iltifat-e-dil-e-dostan rahe na rahe