main shaKH shaKH pe mahka kiran kiran mein raha

maiñ shāḳh shāḳh pe mahkā kiran kiran meñ rahā

ki ruuh ban ke rahā maiñ jis anjuman meñ rahā

asīr-e-kashmakash-e-daur-e-pur-mehan meñ rahā

vo āftāb huuñ jo muddatoñ gahan meñ rahā

ḳhulūs-e-ishq kī mahrūmiyāñ ma.āz-allāh

maiñ umr bhar tahī-dāman bhare chaman meñ rahā

nigāh mahv-e-tamāshā laboñ pe mohar-e-sukūt

maiñ aa.ine kī tarah terī anjuman meñ rahā

kisī se ahd-e-mohabbat pe jab bhī ġhaur kiyā

ik irti.āsh sā pahroñ mire badan meñ rahā

tire baġhair kahīñ bhī to jī bahal na sakā

maiñ chain se kabhī ghar meñ rahā na ban meñ rahā

muhīb itnā ki vo jalva barq-e-tūr banā

latīf itnā ki phūloñ ke pairahan meñ rahā

zabāñ salīs bayāñ dil-navāz fikr jamīl

ye ehtimām hamesha mire suḳhan meñ rahā

vo dostoñ ke azā.em se 'zabt' kyā bachtā

jo dushmanoñ kī taraf se bhī husn-e-zan meñ rahā

main shaKH shaKH pe mahka kiran kiran mein raha

ki ruh ban ke raha main jis anjuman mein raha

asir-e-kashmakash-e-daur-e-pur-mehan mein raha

wo aaftab hun jo muddaton gahan mein raha

KHulus-e-ishq ki mahrumiyan maaz-allah

main umr bhar tahi-daman bhare chaman mein raha

nigah mahw-e-tamasha labon pe mohar-e-sukut

main aaine ki tarah teri anjuman mein raha

kisi se ahd-e-mohabbat pe jab bhi ghaur kiya

ek irtiash sa pahron mere badan mein raha

tere baghair kahin bhi to ji bahal na saka

main chain se kabhi ghar mein raha na ban mein raha

muhib itna ki wo jalwa barq-e-tur bana

latif itna ki phulon ke pairahan mein raha

zaban salis bayan dil-nawaz fikr jamil

ye ehtimam hamesha mere suKHan mein raha

wo doston ke azaem se 'zabt' kya bachta

jo dushmanon ki taraf se bhi husn-e-zan mein raha