main siyah-ru apne Khaaliq se jo neamat mangta

maiñ siyah-rū apne ḳhāliq se jo ne.amat māñgtā

apnā muñh dhone ko pahle āb-e-ḳhajlat māñgtā

mere rūkhe-sūkhe TukḌe mujh ko kar dete haiñ ser

ḳhaak bhar detā falak muñh meñ jo ne.amat māñgtā

ḳhalq par hotī jo ādāb-e-shahādat āshkār

murġh-e-bismil bhī taḌapne kī ijāzat māñgtā

rahm ham-āfat-rasīdoñ par jo kartā āsmān

saañs lene kī hujūm-e-ġham meñ mohlat māñgtā

roltā motī jo kartā kisht-kārī ḳhair kī

hun barastā maiñ agar bārān-e-rahmat māñgtā

past-baḳhtī ne mujhe mahfūz rakkhā shukr hai

TuuT paḌtā āsmāñ sar par jo rif.at māñgtā

qadr mere gauhar-e-dil kī kuchh us but ne na kī

but-kada līlām hotā maiñ jo qīmat māñgtā

ek bosa māñgne par yaar kā ruḳh phir gayā

jaan maiñ detā agar vo be-muravvat māñgtā

maiñ agar āzādgī meñ sarv ko kartā murīd

terā guldasta sā qad tuubā se bai.at māñgtā

dekh paatā kushtagān-e-ishq kā rutba agar

paanī pī pī kar ḳhizar jām-e-shahādat māñgtā

dil meñ paḌte zaḳhm agar gulzār kī kartā havas

maiñ lahū rotā agar bārān-e-rahmat māñgtā

kab rahā sīmāb jab sīmāb chāñdī ho gayā

qalb māhiyyat mirī hotī jo daulat māñgtā

kyā ḳhabar thī sub.h ho jā.egī tere nuur se

shaam se merā charāġh-e-ḳhāna ruḳhsat māñgtā

aañkh jhuk jaatī nazar aatā agar tū ḳhvāb meñ

tere ḳhāl-e-ruḳh se yūsuf dāġh-e-hasrat māñgtā

khā.iye kyūñkar nivāle motiyoñ ke ai havas

tā.ir-e-dil hans kī ai kaash qismat māñgtā

josh-e-vahshat le chalā itnī na mohlat de mujhe

koh-o-sahrā ke azīzoñ se tū ruḳhsat māñgtā

dushmanī rakhtā hai arbāb-e-manash se āsmāñ

haath maltā umr-bhar dam-bhar jo rāhat māñgtā

be diye mumkin nahīñ duniyā meñ ho ijrā-e-kār

āmiloñ se ism-e-āzam bhī hai dāvat māñgtā

ḳhūn-e-āshiq par kamar bāñdhe hue haiñ ḳhūb-rū

teġh-e-misrī halq par hotī jo sharbat māñgtā

kyā ḳhabar thī āsiyoñ kī bhī duā maqbūl hai

'bahr' duniyā ke bakheḌe se farāġhat māñgtā

main siyah-ru apne KHaliq se jo neamat mangta

apna munh dhone ko pahle aab-e-KHajlat mangta

mere rukhe-sukhe TukDe mujh ko kar dete hain ser

KHak bhar deta falak munh mein jo neamat mangta

KHalq par hoti jo aadab-e-shahadat aashkar

murgh-e-bismil bhi taDapne ki ijazat mangta

rahm ham-afat-rasidon par jo karta aasman

sans lene ki hujum-e-gham mein mohlat mangta

rolta moti jo karta kisht-kari KHair ki

hun barasta main agar baran-e-rahmat mangta

past-baKHti ne mujhe mahfuz rakkha shukr hai

TuT paDta aasman sar par jo rifat mangta

qadr mere gauhar-e-dil ki kuchh us but ne na ki

but-kada lilam hota main jo qimat mangta

ek bosa mangne par yar ka ruKH phir gaya

jaan main deta agar wo be-murawwat mangta

main agar aazadgi mein sarw ko karta murid

tera guldasta sa qad tuba se baiat mangta

dekh pata kushtagan-e-ishq ka rutba agar

pani pi pi kar KHizar jam-e-shahadat mangta

dil mein paDte zaKHm agar gulzar ki karta hawas

main lahu rota agar baran-e-rahmat mangta

kab raha simab jab simab chandi ho gaya

qalb mahiyyat meri hoti jo daulat mangta

kya KHabar thi subh ho jaegi tere nur se

sham se mera charagh-e-KHana ruKHsat mangta

aankh jhuk jati nazar aata agar tu KHwab mein

tere KHal-e-ruKH se yusuf dagh-e-hasrat mangta

khaiye kyunkar niwale motiyon ke ai hawas

tair-e-dil hans ki ai kash qismat mangta

josh-e-wahshat le chala itni na mohlat de mujhe

koh-o-sahra ke azizon se tu ruKHsat mangta

dushmani rakhta hai arbab-e-manash se aasman

hath malta umr-bhar dam-bhar jo rahat mangta

be diye mumkin nahin duniya mein ho ijra-e-kar

aamilon se ism-e-azam bhi hai dawat mangta

KHun-e-ashiq par kamar bandhe hue hain KHub-ru

tegh-e-misri halq par hoti jo sharbat mangta

kya KHabar thi aasiyon ki bhi dua maqbul hai

'bahr' duniya ke bakheDe se faraghat mangta