main soz-e-darun apna dikha bhi nahin sakta

maiñ soz-e-darūñ apnā dikhā bhī nahīñ saktā

kyā mujh pe guzartī hai batā bhī nahīñ saktā

raushan hai isī se mirā kāshāna-e-hastī

is sham-e-mohabbat ko bujhā bhī nahīñ saktā

hai bār-e-samā.at use iz.hār-e-tamannā

ye hāl-e-zabūñ us ko sunā bhī nahīñ saktā

zinda hai zamīr apnā abhī, sāmne us ke

apnā sar-e-taslīm jhukā bhī nahīñ saktā

had hotī hai ik naaz uThāne kī kisī ke

ye bār-e-garāñ ab maiñ uThā bhī nahīñ saktā

is haal meñ kab tak yūñhī ghuT ghuT ke jiyūñgā

rūThā hai vo aise ki manā bhī nahīñ saktā

thā ġhair jise apnā samajhtā thā bahī-ḳhvāh

ab mahfil-e-yārāñ vo sajā bhī nahīñ saktā

nāfiz hai zabāñ-bandī kā dastūr abhī tak

kyā dil pe guzartī hai batā bhī nahīñ saktā

har vaqt tasavvur meñ hai jo azmat-e-rafta

khoyā huā e.azāz vo pā bhī nahīñ saktā

ḳhvāboñ meñ hasīñ tāj-mahal kartā hai ta.amīr

apne liye ik ghar jo banā bhī nahīñ saktā

kyuuñ niiñd uḌātā hai vo 'barqī' kī ab us se

vo vāda-e-fardā jo nibhā bhī nahīñ saktā

main soz-e-darun apna dikha bhi nahin sakta

kya mujh pe guzarti hai bata bhi nahin sakta

raushan hai isi se mera kashana-e-hasti

is sham-e-mohabbat ko bujha bhi nahin sakta

hai bar-e-samaat use izhaar-e-tamanna

ye haal-e-zabun us ko suna bhi nahin sakta

zinda hai zamir apna abhi, samne us ke

apna sar-e-taslim jhuka bhi nahin sakta

had hoti hai ek naz uThane ki kisi ke

ye bar-e-garan ab main uTha bhi nahin sakta

is haal mein kab tak yunhi ghuT ghuT ke jiyunga

ruTha hai wo aise ki mana bhi nahin sakta

tha ghair jise apna samajhta tha bahi-KHwah

ab mahfil-e-yaran wo saja bhi nahin sakta

nafiz hai zaban-bandi ka dastur abhi tak

kya dil pe guzarti hai bata bhi nahin sakta

har waqt tasawwur mein hai jo azmat-e-rafta

khoya hua eazaz wo pa bhi nahin sakta

KHwabon mein hasin taj-mahal karta hai tamir

apne liye ek ghar jo bana bhi nahin sakta

kyun nind uData hai wo 'barqi' ki ab us se

wo wada-e-farda jo nibha bhi nahin sakta