main taKHayyul ki salibon pe jo maslub hua

maiñ taḳhayyul kī salīboñ pe jo maslūb huā

phir kahīñ jā ke zarā sāhib-e-uslūb huā

jur.a-e-ashk piyā mast huā raqs kiyā

aisā kaḌvā na mirī jaañ koī mashrūb huā

tere harjā.ī-pane kā ye huā radd-e-amal

mujhe mahbūb milā hai na tujhe ḳhuub huā

bar-sar-e-tūr bhī tū ne ye tahayyur bāñTā

diid kī jot jagā.ī vahīñ mahjūb huā

lazzat-e-vasl meñ niklā huuñ bayābānoñ kī samt

log pāgal haiñ mujhe kahte haiñ majzūb huā

ek arzī pe mujhe des-nikālā kī naved

itnī ujlat se to iblīs na ma.atūb huā

nik.hat-e-vasl se lauT aatī hai āñkhoñ kī chamak

vaise raushan to nahīñ dīda-e-yāqūb huā

main taKHayyul ki salibon pe jo maslub hua

phir kahin ja ke zara sahib-e-uslub hua

jura-e-ashk piya mast hua raqs kiya

aisa kaDwa na meri jaan koi mashrub hua

tere harjai-pane ka ye hua radd-e-amal

mujhe mahbub mila hai na tujhe KHub hua

bar-sar-e-tur bhi tu ne ye tahayyur banTa

did ki jot jagai wahin mahjub hua

lazzat-e-wasl mein nikla hun bayabanon ki samt

log pagal hain mujhe kahte hain majzub hua

ek arzi pe mujhe des-nikala ki nawed

itni ujlat se to iblis na matub hua

nikhat-e-wasl se lauT aati hai aankhon ki chamak

waise raushan to nahin dida-e-yaqub hua