main teri hi aawaz hun aur gunj raha hun

maiñ terī hī āvāz huuñ aur guuñj rahā huuñ

ai dost mujhe sun ki maiñ gumbad kī sadā huuñ

jis raah se pahle koī ho kar nahīñ guzrā

us raah pe maiñ naqsh-e-qadam chhoḌ rahā huuñ

maiñ apne usūloñ kā garāñ baar uThā.e

har vaqt havāoñ ke muḳhālif hī chalā huuñ

be-māya habābo mujhe dekho ki adam se

maiñ sū-e-abad sail kī sūrat meñ bahā huuñ

har asr kī taḳhlīq meñ kuchh haath hai merā

maiñ vaqt ke zindāñ meñ bhī āzād rahā huuñ

sadiyoñ se maiñ apne ko banāne meñ huuñ masrūf

banda huuñ magar ġhaur se dekho to ḳhudā huuñ

hālāt kī gardish se hirāsāñ nahīñ 'jāved'

maiñ gardish-e-aflāk kī godī meñ palā huuñ

main teri hi aawaz hun aur gunj raha hun

ai dost mujhe sun ki main gumbad ki sada hun

jis rah se pahle koi ho kar nahin guzra

us rah pe main naqsh-e-qadam chhoD raha hun

main apne usulon ka garan bar uThae

har waqt hawaon ke muKHalif hi chala hun

be-maya hababo mujhe dekho ki adam se

main su-e-abad sail ki surat mein baha hun

har asr ki taKHliq mein kuchh hath hai mera

main waqt ke zindan mein bhi aazad raha hun

sadiyon se main apne ko banane mein hun masruf

banda hun magar ghaur se dekho to KHuda hun

haalat ki gardish se hirasan nahin 'jawed'

main gardish-e-aflak ki godi mein pala hun