main tha ek sham-e-sozan raat bhar uTTha dhuan mujhse

maiñ thā ik sham-e-sozāñ raat bhar uTThā dhuāñ mujh se

sunī duniyā ne sau sau tarah dil kī dāstāñ mujh se

Dubo dī ābrū-e-soz-e-pinhāñ tū ne āñkhoñ kī

shikāyat kar rahe haiñ qatra-hā-e-rā.egāñ mujh se

rafīq-e-kārvān-e-nig.hat-e-gul hai mirī vahshat

na aage baḌh sakegī tū nigāh-e-bāġhbāñ mujh se

mujhe niiñd aa ga.ī thī raah kī ThanDī havāoñ meñ

maiñ ik vāmāñda huuñ pūchho hadīs-e-kārvāñ mujh se

mire dil kī tamanna turra-e-dastār-e-gulchīñ ho

aur us par ye qayāmat daad māñge bāġhbāñ mujh se

sarāpā mātam-e-nazzāra hai āñkhoñ kī māyūsī

ki parda uTh chukā hai aur jalve haiñ nihāñ mujh se

main tha ek sham-e-sozan raat bhar uTTha dhuan mujh se

suni duniya ne sau sau tarah dil ki dastan mujh se

Dubo di aabru-e-soz-e-pinhan tu ne aankhon ki

shikayat kar rahe hain qatra-ha-e-raegan mujh se

rafiq-e-karwan-e-nighat-e-gul hai meri wahshat

na aage baDh sakegi tu nigah-e-baghban mujh se

mujhe nind aa gai thi rah ki ThanDi hawaon mein

main ek wamanda hun puchho hadis-e-karwan mujh se

mere dil ki tamanna turra-e-dastar-e-gulchin ho

aur us par ye qayamat dad mange baghban mujh se

sarapa matam-e-nazzara hai aankhon ki mayusi

ki parda uTh chuka hai aur jalwe hain nihan mujh se