main tere shahr mein aaya to Thahar jaunga

maiñ tire shahr meñ aayā to Thahar jā.ūñgā

saya-e-abr nahīñ huuñ ki guzar jā.ūñgā

jazba-e-dil kā vo aalam hai to inshā-allāh

dard ban kar tire pahlū meñ utar jā.ūñgā

mahz bekār na samjheñ mujhe duniyā vaale

zindagī hai to koī kaam bhī kar jā.ūñgā

de ke āvāz to dekhe shab-e-tārīk mujhe

raushnī ban ke fazāoñ meñ bikhar jā.ūñgā

chhoḌ ai raunaq-e-bāzār mirā dāman-e-dil

shaam āñgan meñ utar aa.ī hai ghar jā.ūñgā

maiñ mujāhid huuñ kisī se nahīñ Dartā lekin

sāmnā ḳhud kā jo ho jaa.e to Dar jā.ūñgā

rāste saaf haiñ sab fazl-e-ḳhudā se 'māhir'

koī dīvār na rokegī jidhar jā.ūñgā

main tere shahr mein aaya to Thahar jaunga

saya-e-abr nahin hun ki guzar jaunga

jazba-e-dil ka wo aalam hai to insha-allah

dard ban kar tere pahlu mein utar jaunga

mahz bekar na samjhen mujhe duniya wale

zindagi hai to koi kaam bhi kar jaunga

de ke aawaz to dekhe shab-e-tarik mujhe

raushni ban ke fazaon mein bikhar jaunga

chhoD ai raunaq-e-bazar mera daman-e-dil

sham aangan mein utar aai hai ghar jaunga

main mujahid hun kisi se nahin Darta lekin

samna KHud ka jo ho jae to Dar jaunga

raste saf hain sab fazl-e-KHuda se 'mahir'

koi diwar na rokegi jidhar jaunga