main to main ghair ko marne se ab inkar nahin

maiñ to maiñ ġhair ko marne se ab inkār nahīñ

ik qayāmat hai tire haath meñ talvār nahīñ

kuchh patā manzil-e-maqsūd kā paayā ham ne

jab ye jaanā ki hameñ tāqat-e-raftār nahīñ

chashm-e-bad-dūr bahut phirte haiñ aġhyār ke saath

ġhairat-e-ishq se ab tak vo ḳhabar-dār nahīñ

ho chukā naaz uThāne meñ hai go kaam tamām

lillāhil-hamd ki bāham koī takrār nahīñ

muddatoñ rashk ne aġhyār se milne na diyā

dil ne āḳhir ye diyā hukm ki kuchh aar nahīñ

asl maqsūd kā har chiiz meñ miltā hai patā

varna ham aur kisī shai ke talabgār nahīñ

baat jo dil meñ chhupāte nahīñ bantī 'hālī'

saḳht mushkil hai ki vo qābil-e-iz.hār nahīñ

main to main ghair ko marne se ab inkar nahin

ek qayamat hai tere hath mein talwar nahin

kuchh pata manzil-e-maqsud ka paya hum ne

jab ye jaana ki hamein taqat-e-raftar nahin

chashm-e-bad-dur bahut phirte hain aghyar ke sath

ghairat-e-ishq se ab tak wo KHabar-dar nahin

ho chuka naz uThane mein hai go kaam tamam

lillahil-hamd ki baham koi takrar nahin

muddaton rashk ne aghyar se milne na diya

dil ne aaKHir ye diya hukm ki kuchh aar nahin

asl maqsud ka har chiz mein milta hai pata

warna hum aur kisi shai ke talabgar nahin

baat jo dil mein chhupate nahin banti 'haali'

saKHt mushkil hai ki wo qabil-e-izhaar nahin