main to samjha tha mera kirdar hi mara gaya

maiñ to samjhā thā mirā kirdār hī maarā gayā

is kahānī meñ kahānī-kār hī maarā gayā

dushmanī karne kā phir kyā fā.eda hai tū batā

maiñ tire hāthoñ agar be-kār hī maarā gayā

maiñ ḳhayāl-e-yār kī sochoñ ko sochūñ kis tarah

maiñ ḳhayāl-e-yār meñ sau baar hī maarā gayā

phir mohabbat ho ga.ī ham ko tumhārī yaad se

phir dil-e-bismil dil-e-bīmār hī maarā gayā

ab to jiine kī koī sūrat nahīñ aatī nazar

ab to marne do ki merā yaar hī maarā gayā

ham pe aisā hādisa guzrā mohabbat meñ 'vaqās'

ham rahe zinda hamārā pyaar hī maarā gayā

main to samjha tha mera kirdar hi mara gaya

is kahani mein kahani-kar hi mara gaya

dushmani karne ka phir kya faeda hai tu bata

main tere hathon agar be-kar hi mara gaya

main KHayal-e-yar ki sochon ko sochun kis tarah

main KHayal-e-yar mein sau bar hi mara gaya

phir mohabbat ho gai hum ko tumhaari yaad se

phir dil-e-bismil dil-e-bimar hi mara gaya

ab to jine ki koi surat nahin aati nazar

ab to marne do ki mera yar hi mara gaya

hum pe aisa hadisa guzra mohabbat mein 'waqas'

hum rahe zinda hamara pyar hi mara gaya