main tumko jo mil jati yun rab ne kya hota

maiñ tum ko jo mil jaatī yuuñ rab ne kyā hotā

tum mujh ko jo mil jaate kyā us kā gayā hotā

zaḳhmoñ ko mire dil ke kuchh aise siyā hotā

''va.ada na vafā karte va.ada to kiyā hotā''

Thokar to maiñ khātī par girtī na kabhī lekin

patthar sā kabhī tū jo raste meñ paḌā hotā

ham bhaa.ī to haiñ lekin ghar donoñ ke chhoTe haiñ

ik ghar meñ hī rah lete jo thoḌā baḌā hotā

gul un pe khile the jo murjhā ga.e vo saare

ik peḌ hī vaadī meñ ai kaash harā hotā

ik moḌ pe milnā thā ham donoñ ko āḳhir to

kyā terā bigaḌ jaatā va.ada jo vafā hotā

kyoñ mujh se bichhaḌne kī jaldī thī tumheñ itnī

tum dil meñ rahe hote dil ġham se rihā hotā

jin hoñToñ se khiltī thiiñ kaliyāñ ka.ī lafzoñ kī

in hoñToñ kī jumbish se ik naam liyā hotā

maiñ girne hī kyoñ paatī kyoñ daldal meñ masā.ib kī

jo aa ke kabhī mujh ko bas thaam liyā hotā

maiñ lauT ke aa.ī to ghar kā vahī āñgan thā

hasrat hī rahī dil meñ kuchh ghar meñ nayā hotā

main tum ko jo mil jati yun rab ne kya hota

tum mujh ko jo mil jate kya us ka gaya hota

zaKHmon ko mere dil ke kuchh aise siya hota

wada na wafa karte wada to kiya hota

Thokar to main khati par girti na kabhi lekin

patthar sa kabhi tu jo raste mein paDa hota

hum bhai to hain lekin ghar donon ke chhoTe hain

ek ghar mein hi rah lete jo thoDa baDa hota

gul un pe khile the jo murjha gae wo sare

ek peD hi wadi mein ai kash hara hota

ek moD pe milna tha hum donon ko aaKHir to

kya tera bigaD jata wada jo wafa hota

kyon mujh se bichhaDne ki jaldi thi tumhein itni

tum dil mein rahe hote dil gham se riha hota

jin honTon se khilti thin kaliyan kai lafzon ki

in honTon ki jumbish se ek nam liya hota

main girne hi kyon pati kyon daldal mein masaib ki

jo aa ke kabhi mujh ko bas tham liya hota

main lauT ke aai to ghar ka wahi aangan tha

hasrat hi rahi dil mein kuchh ghar mein naya hota