main us but ka wasl ai KHuda chahta hun

maiñ us but kā vasl ai ḳhudā chāhtā huuñ

maraz ishq kā hai davā chāhtā huuñ

bayān-e-malāhat kiyā chāhtā huuñ

suḳhan meñ namak kā mazā chāhtā huuñ

na dekhūñ maiñ us gul ke pahlū meñ kāñTā

uḌe ġhair aisī huā chāhtā huuñ

mujhe tasma-bandī ho ai zulf-e-pechāñ

faqīr āj-kal maiñ huā chāhtā huuñ

lagī be-tarah hai ḳhudā hī bachā.e

sulagtā hai dil meñ jalā chāhtā huuñ

bahut karvaTeñ liiñ nahīñ niiñd aatī

baġhal meñ koī dilrubā chāhtā huuñ

mohabbat meñ ye aql zaa.il huī hai

ki ahl-e-daġhā se vafā chāhtā huuñ

khule hāl-e-bīmār chashm-e-suḳhan-go

ishāroñ meñ bāteñ kiyā chāhtā huuñ

burā maan jāoge muñh pher loge

na pūchho qasam de ke kyā chāhtā huuñ

nigāheñ ulajhtī haiñ zulfoñ meñ be-Dhab

un āñkhoñ ke hāthoñ phañsā chāhtā huuñ

mah-e-nau ke misre meñ misre lagā.ūñ

maiñ itnī tabī.at-rasā chāhtā huuñ

hue chāra-jū kab marīz-e-mohabbat

ḳhudā maut de jo shifā chāhtā huuñ

vahī dushman-e-jāñ hai ai 'bahr' merā

jise jaan se maiñ sivā chāhtā huuñ

main us but ka wasl ai KHuda chahta hun

maraz ishq ka hai dawa chahta hun

bayan-e-malahat kiya chahta hun

suKHan mein namak ka maza chahta hun

na dekhun main us gul ke pahlu mein kanTa

uDe ghair aisi hua chahta hun

mujhe tasma-bandi ho ai zulf-e-pechan

faqir aaj-kal main hua chahta hun

lagi be-tarah hai KHuda hi bachae

sulagta hai dil mein jala chahta hun

bahut karwaTen lin nahin nind aati

baghal mein koi dilruba chahta hun

mohabbat mein ye aql zail hui hai

ki ahl-e-dagha se wafa chahta hun

khule haal-e-bimar chashm-e-suKHan-go

ishaaron mein baaten kiya chahta hun

bura man jaoge munh pher loge

na puchho qasam de ke kya chahta hun

nigahen ulajhti hain zulfon mein be-Dhab

un aankhon ke hathon phansa chahta hun

mah-e-nau ke misre mein misre lagaun

main itni tabiat-rasa chahta hun

hue chaara-ju kab mariz-e-mohabbat

KHuda maut de jo shifa chahta hun

wahi dushman-e-jaan hai ai 'bahr' mera

jise jaan se main siwa chahta hun