main zoaf se jun naqsh-e-qadam uTh nahin sakta

maiñ zo.af se juuñ naqsh-e-qadam uTh nahīñ saktā

baiThā huuñ sar-e-ḳhāk pe jam uTh nahīñ saktā

ai ashk-e-ravāñ saath le ab āh-e-jigar ko

āshiq kahīñ be-fauj-o-alam uTh nahīñ saktā

saqf-e-falak-e-kohna meñ kyā ḳhaak lagā.ūñ

ai zo.af-e-dil is aah kā tham uTh nahīñ saktā

sar ma.arka-e-ishq meñ āsāñ nahīñ denā

gaaḌe hai jahāñ sham.a qadam uTh nahīñ saktā

hai jumbish-e-mizhgāñ kā kisī ke jo tasavvur

dil se ḳhalish-e-ḳhār-e-alam uTh nahīñ saktā

dil par hai mire ḳhema-e-har-ābla asnād

kyā kījiye ki ye lashkar-e-ġham uTh nahīñ saktā

har jā mutajalla hai vo bar parda-e-ġhaflat

ai mo.atakif-e-dair-o-haram uTh nahīñ saktā

yuuñ ashk zamīñ par haiñ ki manzil ko pahuñch kar

juuñ qāfila-e-mulk-e-adam uTh nahīñ saktā

ro ro ke likhā ḳhat jo use maiñ ne to bolā

ik harf sar-e-kāġhaz-e-nam uTh nahīñ saktā

har dam lab-e-favvāra se jaarī ye suḳhan hai

paanī na zarā jis meñ ho dam uTh nahīñ saktā

maiñ uTh ke kidhar jā.ūñ Thikānā nahīñ koī

merā tire kūche se qadam uTh nahīñ saktā

mehñdī to sarāsar nahīñ paañv meñ lagī hai

tū bahr-ayādat jo sanam uTh nahīñ saktā

bīmār tirā sūrat-e-tasvīr-e-nihālī

bistar se tire sar kī qasam uTh nahīñ saktā

maiñ shāh-savār aaj huuñ maidān-e-suḳhan meñ

rustam kā mire aage qadam uTh nahīñ saktā

kyā neza hilāvegā koī ab ki kisī se

yaañ tausan-e-rahvār-e-qalam uTh nahīñ saktā

juuñ ġhuncha 'nasīr' us but-e-gul-rū kī jo hai yaad

yaañ sar ho garebāñ se baham uTh nahīñ saktā

main zoaf se jun naqsh-e-qadam uTh nahin sakta

baiTha hun sar-e-KHak pe jam uTh nahin sakta

ai ashk-e-rawan sath le ab aah-e-jigar ko

aashiq kahin be-fauj-o-alam uTh nahin sakta

saqf-e-falak-e-kohna mein kya KHak lagaun

ai zoaf-e-dil is aah ka tham uTh nahin sakta

sar marka-e-ishq mein aasan nahin dena

gaDe hai jahan shama qadam uTh nahin sakta

hai jumbish-e-mizhgan ka kisi ke jo tasawwur

dil se KHalish-e-KHar-e-alam uTh nahin sakta

dil par hai mere KHema-e-har-abla asnad

kya kijiye ki ye lashkar-e-gham uTh nahin sakta

har ja mutajalla hai wo bar parda-e-ghaflat

ai moatakif-e-dair-o-haram uTh nahin sakta

yun ashk zamin par hain ki manzil ko pahunch kar

jun qafila-e-mulk-e-adam uTh nahin sakta

ro ro ke likha KHat jo use main ne to bola

ek harf sar-e-kaghaz-e-nam uTh nahin sakta

har dam lab-e-fawwara se jari ye suKHan hai

pani na zara jis mein ho dam uTh nahin sakta

main uTh ke kidhar jaun Thikana nahin koi

mera tere kuche se qadam uTh nahin sakta

mehndi to sarasar nahin panw mein lagi hai

tu bahr-ayaadat jo sanam uTh nahin sakta

bimar tera surat-e-taswir-e-nihaali

bistar se tere sar ki qasam uTh nahin sakta

main shah-sawar aaj hun maidan-e-suKHan mein

rustam ka mere aage qadam uTh nahin sakta

kya neza hilawega koi ab ki kisi se

yan tausan-e-rahwar-e-qalam uTh nahin sakta

jun ghuncha 'nasir' us but-e-gul-ru ki jo hai yaad

yan sar ho gareban se baham uTh nahin sakta