majaz ain-e-haqiqat hai ba-safa ke liye

majāz ain-e-haqīqat hai bā-safā ke liye

butoñ ko dekh rahā huuñ magar ḳhudā ke liye

asar meñ ho ga.e kyuuñ saat āsmāñ haa.el

abhī to haath uThe hī nahīñ duā ke liye

huā bas ek hī naale meñ dam fanā apnā

ye tāziyāna thā umr-e-gurez-pā ke liye

ilāhī ek ġham-e-rozgār kyā kam thā

ki ishq bhej diyā jān-e-mubtalā ke liye

hameñ to dāvar-e-mahshar ko chhoḌte hī banī

ḳhatā-e-ishq na kaafī huī sazā ke liye

usī ko raah dikhātā huuñ jo miTā.e mujhe

maiñ huuñ to nuur magar chashm-e-naqsh-e-pā ke liye

ye jāntā huuñ ki hai nisf shab magar saaqī

zarā sī chāhiye ik mard-e-pārsā ke liye

ilāhī tere karam se mile mai o ma.ashūq

ab iltijā hai barastī huī ghaTā ke liye

'hafīz' āzim-e-ka.aba huā hai jaane do

ab us pe rahm karo ai buto ḳhudā ke liye

majaz ain-e-haqiqat hai ba-safa ke liye

buton ko dekh raha hun magar KHuda ke liye

asar mein ho gae kyun sat aasman hael

abhi to hath uThe hi nahin dua ke liye

hua bas ek hi nale mein dam fana apna

ye taziyana tha umr-e-gurez-pa ke liye

ilahi ek gham-e-rozgar kya kam tha

ki ishq bhej diya jaan-e-mubtala ke liye

hamein to dawar-e-mahshar ko chhoDte hi bani

KHata-e-ishq na kafi hui saza ke liye

usi ko rah dikhata hun jo miTae mujhe

main hun to nur magar chashm-e-naqsh-e-pa ke liye

ye jaanta hun ki hai nisf shab magar saqi

zara si chahiye ek mard-e-parsa ke liye

ilahi tere karam se mile mai o mashuq

ab iltija hai barasti hui ghaTa ke liye

'hafiz' aazim-e-kaba hua hai jaane do

ab us pe rahm karo ai buto KHuda ke liye