majbur-e-iltifat bhi honge jafa ke baad

majbūr-e-iltifāt bhī hoñge jafā ke baad

aatā hai inqalāb agar intihā ke baad

sab ko na.e na.e se ujāloñ kī fikr hai

tahrīk-e-ehtiyāt chalī hai havā ke baad

maazī kā tazkira hai na ab fikr-e-hāl hai

bedār ho gayā huuñ maiñ kis kī sadā ke baad

paate haiñ lā-shu.ūr meñ ham qalb-e-māhiyat

ehsās kuchh latīf hai itnā sazā ke baad

dushvār us pe ho ga.ī kuchh aur dastaras

jab tajziya kiyā hai asar kā duā ke baad

vo din ga.e ki ḳhāk-nashīnoñ ke dost the

ab to samajh rahe haiñ vo ḳhud ko ḳhudā ke baad

tauhīn-e-ārzū hai jahān-e-shu.ūr meñ

tark-e-vafā kā vahm bhī azm-e-vafā ke baad

jiine kī ik umiid to paidā huī 'nazar'

dil mutma.in hameñ nazar aayā jafā ke baad

majbur-e-iltifat bhi honge jafa ke baad

aata hai inqalab agar intiha ke baad

sab ko nae nae se ujalon ki fikr hai

tahrik-e-ehtiyat chali hai hawa ke baad

mazi ka tazkira hai na ab fikr-e-haal hai

bedar ho gaya hun main kis ki sada ke baad

pate hain la-shuur mein hum qalb-e-mahiyat

ehsas kuchh latif hai itna saza ke baad

dushwar us pe ho gai kuchh aur dastaras

jab tajziya kiya hai asar ka dua ke baad

wo din gae ki KHak-nashinon ke dost the

ab to samajh rahe hain wo KHud ko KHuda ke baad

tauhin-e-arzu hai jahan-e-shuur mein

tark-e-wafa ka wahm bhi azm-e-wafa ke baad

jine ki ek umid to paida hui 'nazar'

dil mutmain hamein nazar aaya jafa ke baad