majmua-e-KHayal pareshan kiye hue

majmūa-e-ḳhayāl pareshāñ kiye hue

baiThā huuñ phir junūñ ko maiñ mehmāñ kiye hue

maiñ likh rahā huuñ sharh-e-hayāt-e-alam-nasīb

qatrāt ḳhūn-e-dil sar-e-unvāñ kiye hue

detā huuñ phir ḳhayāl ko maiñ dāvat-e-junūñ

zarroñ ko apne dil ke bayābāñ kiye hue

vahshat ba-qaid-e-ishq nahīñ muddateñ huiiñ

phirtā huuñ yūñhī chaak garebāñ kiye hue

ai āftāb-e-hashr zarā ik nazar idhar

laayā huuñ dil ke daaġh numāyāñ kiye hue

allāh kā shukr hai ki khaḌā hai koī qarīb

mushkil ko vaqt-e-naz.a kī āsāñ kiye hue

kyoñ ahl-e-hashr koī bhī kuchh pūchhtā nahīñ

phirte haiñ tar lahū meñ vo dāmāñ kiye hue

majmua-e-KHayal pareshan kiye hue

baiTha hun phir junun ko main mehman kiye hue

main likh raha hun sharh-e-hayat-e-alam-nasib

qatraat KHun-e-dil sar-e-unwan kiye hue

deta hun phir KHayal ko main dawat-e-junun

zarron ko apne dil ke bayaban kiye hue

wahshat ba-qaid-e-ishq nahin muddaten huin

phirta hun yunhi chaak gareban kiye hue

ai aaftab-e-hashr zara ek nazar idhar

laya hun dil ke dagh numayan kiye hue

allah ka shukr hai ki khaDa hai koi qarib

mushkil ko waqt-e-naza ki aasan kiye hue

kyon ahl-e-hashr koi bhi kuchh puchhta nahin

phirte hain tar lahu mein wo daman kiye hue