majnun ko apni laila ka mahmil aziz hai

majnūñ ko apnī lailā kā mahmil aziiz hai

tū dil meñ hai hamāre hameñ dil aziiz hai

abrū-o-chashm-o-zulf mizha kī to kahiye kyā

ham ko to tere muñh se tirā til aziiz hai

dil ko kiyā jo qatl to us ne bhalā kiyā

mujh ko to apne dil se vo qātil aziiz hai

itnā nahīñ koī ki pakaḌ āstīñ mirī

us se kahe ki tujh pe ye maa.il aziiz hai

jā baiThte haiñ chhup ke kabhī ham bhī us jagah

is vāste hameñ tirī mahfil aziiz hai

ik naqsh de ki jis se musaḳhḳhar ho vo parī

aisā bhī dosto koī aamil aziiz hai

kyūñkar karūñ na is dil-e-majrūh kā ilaaj

muddat kā hai rafīq ye ghāyal aziiz hai

ne huur na parī hai na vo māh-mushtarī

ik nuur hai ki sab ko vo hāsil aziiz hai

hijrāñ meñ intizār bhī hai us kā muġhtanim

jo Dūbtā ho us ko to sāhil aziiz hai

ān-o-adā meñ Thor hī rakhtā hai ḳhalq ko

apne to fan meñ ek vo kāmil aziiz hai

kyūñkar na chāhe us ko har ik jaan kī tarah

ḳhvāhish meñ us kī sab haiñ vo har dil aziiz hai

hir-phir ke tere kūche meñ karte haiñ ham maqām

ham se musāfiroñ ko ye manzil aziiz hai

sohbat se koī kyūñki 'hasan' ke na hove ḳhush

shā.ir hai yār-bāsh hai qābil aziiz hai

majnun ko apni laila ka mahmil aziz hai

tu dil mein hai hamare hamein dil aziz hai

abru-o-chashm-o-zulf mizha ki to kahiye kya

hum ko to tere munh se tera til aziz hai

dil ko kiya jo qatl to us ne bhala kiya

mujh ko to apne dil se wo qatil aziz hai

itna nahin koi ki pakaD aastin meri

us se kahe ki tujh pe ye mail aziz hai

ja baiThte hain chhup ke kabhi hum bhi us jagah

is waste hamein teri mahfil aziz hai

ek naqsh de ki jis se musaKHKHar ho wo pari

aisa bhi dosto koi aamil aziz hai

kyunkar karun na is dil-e-majruh ka ilaj

muddat ka hai rafiq ye ghayal aziz hai

ne hur na pari hai na wo mah-mushtari

ek nur hai ki sab ko wo hasil aziz hai

hijran mein intizar bhi hai us ka mughtanim

jo Dubta ho us ko to sahil aziz hai

aan-o-ada mein Thor hi rakhta hai KHalq ko

apne to fan mein ek wo kaamil aziz hai

kyunkar na chahe us ko har ek jaan ki tarah

KHwahish mein us ki sab hain wo har dil aziz hai

hir-phir ke tere kuche mein karte hain hum maqam

hum se musafiron ko ye manzil aziz hai

sohbat se koi kyunki 'hasan' ke na howe KHush

shair hai yar-bash hai qabil aziz hai