makr-e-hayat ruKH ki qaba bhi utar di

makr-e-hayāt ruḳh kī qabā bhī utaar dī

ham ne taḌap taḌap ke ye shab bhī guzār dī

ab ham pe ḳhaak dekhiye kis dasht kī paḌe

yaañ to azān-e-sub.h sar-e-auj-e-dār dī

ab tum karo surāġh-e-jamāl-e-butāñ talāsh

ham ne tumheñ amānat-e-chashm-o-azār dī

dekhī haiñ yuuñ bhī chāragaroñ kī karāmateñ

zaḳhm-e-lahū-lahū ko davā ḳhaar ḳhaar dī

yuuñ bhī kiyā hai ham ne haq-e-dilbarī adā

apnī hī jiit apne hī hāthoñ se haar dī

'sālim' ḳhushā hai us ko bahut tujh pe e'timād

jis ne tujhe aziyyat-e-dil be-shumār dī

makr-e-hayat ruKH ki qaba bhi utar di

hum ne taDap taDap ke ye shab bhi guzar di

ab hum pe KHak dekhiye kis dasht ki paDe

yan to azan-e-subh sar-e-auj-e-dar di

ab tum karo suragh-e-jamal-e-butan talash

hum ne tumhein amanat-e-chashm-o-azar di

dekhi hain yun bhi chaaragaron ki karamaten

zaKHm-e-lahu-lahu ko dawa KHar KHar di

yun bhi kiya hai hum ne haq-e-dilbari ada

apni hi jit apne hi hathon se haar di

'salim' KHusha hai us ko bahut tujh pe e'timad

jis ne tujhe aziyyat-e-dil be-shumar di