malal-o-hasrat-o-bim-o-raja bahut kuchh hai

malāl-o-hasrat-o-bīm-o-rajā bahut kuchh hai

hamāre paas ḳhudā kā diyā bahut kuchh hai

matā-e-ġham meñ abhī tak kamī nahīñ aa.ī

agarche raah meñ apnā luTā bahut kuchh hai

ḳhushī agar na milī zindagī meñ kyā ġham hai

hamāre paas ḳhushī ke sivā bahut kuchh hai

ye aur baat hameñ tum na mil sake lekin

tumhārī bazm se ham ko milā bahut kuchh hai

vo aaj jis se hai ye ḳhātir-e-hazīñ raushan

usī ke sho.aloñ meñ ye dil-jalā bahut kuchh hai

milī na dād-e-suḳhan nā-shanās logoñ se

suḳhan kā apne yahī ik sila bahut kuchh hai

'urūj' vo hī nahīñ kah sake jo kahnā thā

sunā to ye thā ki tum ne kahā bahut kuchh hai

malal-o-hasrat-o-bim-o-raja bahut kuchh hai

hamare pas KHuda ka diya bahut kuchh hai

mata-e-gham mein abhi tak kami nahin aai

agarche rah mein apna luTa bahut kuchh hai

KHushi agar na mili zindagi mein kya gham hai

hamare pas KHushi ke siwa bahut kuchh hai

ye aur baat hamein tum na mil sake lekin

tumhaari bazm se hum ko mila bahut kuchh hai

wo aaj jis se hai ye KHatir-e-hazin raushan

usi ke shoalon mein ye dil-jala bahut kuchh hai

mili na dad-e-suKHan na-shanas logon se

suKHan ka apne yahi ek sila bahut kuchh hai

'uruj' wo hi nahin kah sake jo kahna tha

suna to ye tha ki tum ne kaha bahut kuchh hai