mamnun-e-gesu-o-lab-o-ruKHsar kaun hai

mamnūn-e-gesū-o-lab-o-ruḳhsār kaun hai

mujh sā shahīd-e-tāla-e-bedār kaun hai

mahv-e-tavāf-e-kūcha-e-jānāñ sabhī to haiñ

lekin ye dekhiye ki sar-e-dār kaun hai

ik sham.a hai so jaltī hai apnī hī aag meñ

ai soz-e-ishq terā azādār kaun hai

duniyā hai qaid-ḳhāna sabhī qaid haiñ magar

in qaidiyoñ meñ terā giraftār kaun hai

gul raah meñ bichhe hoñ to sāthī hazār haiñ

lekin rafīq-e-vādī-e-pur-ḳhār kaun hai

dil meñ huuñ nāvak-e-ġham-e-daurāñ liye hue

mujh sā harīs-e-lazzat-e-āzār kaun hai

sab pherte haiñ tujh se nazar ai zavāl-e-husn

ā.īne ke sivā tirā ġham-ḳhvār kaun hai

apnī dūkāñ baḌhā.iye ab hazrat-e-'vafā'

is daur meñ vafā kā ḳharīdār kaun hai

mamnun-e-gesu-o-lab-o-ruKHsar kaun hai

mujh sa shahid-e-tala-e-bedar kaun hai

mahw-e-tawaf-e-kucha-e-jaanan sabhi to hain

lekin ye dekhiye ki sar-e-dar kaun hai

ek shama hai so jalti hai apni hi aag mein

ai soz-e-ishq tera azadar kaun hai

duniya hai qaid-KHana sabhi qaid hain magar

in qaidiyon mein tera giraftar kaun hai

gul rah mein bichhe hon to sathi hazar hain

lekin rafiq-e-wadi-e-pur-KHar kaun hai

dil mein hun nawak-e-gham-e-dauran liye hue

mujh sa haris-e-lazzat-e-azar kaun hai

sab pherte hain tujh se nazar ai zawal-e-husn

aaine ke siwa tera gham-KHwar kaun hai

apni dukan baDhaiye ab hazrat-e-'wafa'

is daur mein wafa ka KHaridar kaun hai