man bai-ragi tan anuragi qadam qadam dushwari hai

man bai-rāgī tan anurāgī qadam qadam dushvārī hai

jīvan jiinā sahl na jaano bahut baḌī fankārī hai

auroñ jaise ho kar bhī ham bā-izzat haiñ bastī meñ

kuchh logoñ kā sīdhā-pan hai kuchh apnī ayyārī hai

jab jab mausam jhūmā ham ne kapḌe phāḌe shor kiyā

har mausam shā.ista rahnā korī duniyā-dārī hai

aib nahīñ hai is meñ koī lāl-parī nā phūl-kalī

ye mat pūchho vo achchhā hai yā achchhī nādārī hai

jo chehra dekhā vo toḌā nagar nagar vīrān kiye

pahle auroñ se nā-ḳhush the ab ḳhud se be-zārī hai

man bai-ragi tan anuragi qadam qadam dushwari hai

jiwan jina sahl na jaano bahut baDi fankari hai

auron jaise ho kar bhi hum ba-izzat hain basti mein

kuchh logon ka sidha-pan hai kuchh apni ayyari hai

jab jab mausam jhuma hum ne kapDe phaDe shor kiya

har mausam shaista rahna kori duniya-dari hai

aib nahin hai is mein koi lal-pari na phul-kali

ye mat puchho wo achchha hai ya achchhi nadari hai

jo chehra dekha wo toDa nagar nagar viran kiye

pahle auron se na-KHush the ab KHud se be-zari hai