mansur pite hi mai-e-ulfat bahak gaya

mansūr piite hī mai-e-ulfat bahak gayā

jām-e-mai-e-alast bharā thā chhalak gayā

piirī huī shabāb se utrā jhaTak gayā

shā.ir huuñ merā misr-e-sānī laTak gayā

mujh rind-pāk kā kabhī chullū na bhar diyā

saaqī tire karam se har ik yaar chhak gayā

maiñ loT ho gayā huuñ ḳhat-e-sabz-rañg par

ḳhār-e-chaman se dāman-e-dil pe aTak gayā

piirī meñ dil diyā but-e-be-raham yaar ko

manzil qarīb thī ki musāfir bahak gayā

bhaḌkāyā dil ko tazkira-e-husn-e-yār ne

ek Dher aag kā thā havā se dahak gayā

parda sharāb-e-ishq kā mansūr se khulā

naddāf thā ki pamba-e-mīnā dhanak gayā

bulbul hai chup nasīm-e-sahar bhī ḳhamosh hai

shāyad chaman meñ barg-e-ḳharābī khaḌak gayā

jām-e-bilūr mai kā bharā yaar ne diyā

shab ko hamārā aḳhtar-e-tāle.a chamak gayā

tū vo hasīñ huā ki hue tujh pe sab fidā

aisā hī gul khilā ki zamānā mahak gayā

rutba tire karam se huā ḳhāksār kā

ḳhurshīd kī tarah se ye zarra chamak gayā

saude se jo bharā vo huā sar vabāl-e-dosh

bār-e-shajar huā vo samar jo ki pak gayā

lagtā bahār-e-gul meñ garebāñ kā kyā patā

dāman ke phāḌne meñ kaho haath thak gayā

mansur pite hi mai-e-ulfat bahak gaya

jam-e-mai-e-alast bhara tha chhalak gaya

piri hui shabab se utra jhaTak gaya

shair hun mera misr-e-sani laTak gaya

mujh rind-pak ka kabhi chullu na bhar diya

saqi tere karam se har ek yar chhak gaya

main loT ho gaya hun KHat-e-sabz-rang par

KHar-e-chaman se daman-e-dil pe aTak gaya

piri mein dil diya but-e-be-raham yar ko

manzil qarib thi ki musafir bahak gaya

bhaDkaya dil ko tazkira-e-husn-e-yar ne

ek Dher aag ka tha hawa se dahak gaya

parda sharab-e-ishq ka mansur se khula

naddaf tha ki pamba-e-mina dhanak gaya

bulbul hai chup nasim-e-sahar bhi KHamosh hai

shayad chaman mein barg-e-KHarabi khaDak gaya

jam-e-bilur mai ka bhara yar ne diya

shab ko hamara aKHtar-e-talea chamak gaya

tu wo hasin hua ki hue tujh pe sab fida

aisa hi gul khila ki zamana mahak gaya

rutba tere karam se hua KHaksar ka

KHurshid ki tarah se ye zarra chamak gaya

saude se jo bhara wo hua sar wabaal-e-dosh

bar-e-shajar hua wo samar jo ki pak gaya

lagta bahaar-e-gul mein gareban ka kya pata

daman ke phaDne mein kaho hath thak gaya