manzar ko kisi tarah badalne ki dua de

manzar ko kisī tarah badalne kī duā de

de raat kī ThanDak ko pighalne kī duā de

ai sā.at-e-vīrān ke be-ḳhvāb farishte

ab chīḳh ko siine se nikalne kī duā de

patte ko parindoñ kī panāhoñ pe lagā de

peḌoñ ko yahāñ phūlne phalne kī duā de

paḌh aisā vazīfa ki ye kohsār na ujḌe

chashmoñ ko pahāḌoñ se ubalne kī duā de

ab toḌ takānoñ ke takalluf se ta.alluq

pazhmurda tabī.at ko phisalne kī duā de

āfāq kī dīvāroñ kī āġhosh ko vā kar

ab matl.a-e-maujūd ko khulne kī duā de

ham bhuul hī jaa.eñ na kisī shakl-e-sahar ko

ab shab ko kisī taur se Dhalne kī duā de

manzar ko kisi tarah badalne ki dua de

de raat ki ThanDak ko pighalne ki dua de

ai saat-e-viran ke be-KHwab farishte

ab chiKH ko sine se nikalne ki dua de

patte ko parindon ki panahon pe laga de

peDon ko yahan phulne phalne ki dua de

paDh aisa wazifa ki ye kohsar na ujDe

chashmon ko pahaDon se ubalne ki dua de

ab toD takanon ke takalluf se talluq

pazhmurda tabiat ko phisalne ki dua de

aafaq ki diwaron ki aaghosh ko wa kar

ab matla-e-maujud ko khulne ki dua de

hum bhul hi jaen na kisi shakl-e-sahar ko

ab shab ko kisi taur se Dhalne ki dua de