manzar meri nazar ne sanwara zamin par

manzar mirī nazar ne sañvārā zamīn par

zarra banā diyā hai sitāra zamīn par

guzrā hai āsmāñ kī taraf dekhte hue

jitnā bhī vaqt ham ne guzārā zamīn par

tū hai falak-shanās zarā dekh kar batā

kab Tuut kar giregā sitāra zamīn par

kaise ḳhalā ne ham ko uchhālā hai is taraf

kyā āsmān kā hai kināra zamīn par

ai dost DhūñDh yaar koī āsmān meñ

yaarī kā hai nahīñ tujhe yaarā zamīn par

rad kī hai tīrgī to phir apnā bhī aapne

saaya nahīñ kiyā hai gavāra zamīn par

'āsim' ajal thī roz-e-azal hī se taak meñ

lā kar falak kā aadmī maarā zamīn par

manzar meri nazar ne sanwara zamin par

zarra bana diya hai sitara zamin par

guzra hai aasman ki taraf dekhte hue

jitna bhi waqt hum ne guzara zamin par

tu hai falak-shanas zara dekh kar bata

kab Tut kar girega sitara zamin par

kaise KHala ne hum ko uchhaala hai is taraf

kya aasman ka hai kinara zamin par

ai dost DhunDh yar koi aasman mein

yari ka hai nahin tujhe yara zamin par

rad ki hai tirgi to phir apna bhi aapne

saya nahin kiya hai gawara zamin par

'asim' ajal thi roz-e-azal hi se tak mein

la kar falak ka aadmi mara zamin par