manzaron ke darmiyan manzar banana chahiye

manzaroñ ke darmiyāñ manzar banānā chāhiye

rahnavard-e-shauq ko rasta dikhānā chāhiye

apne saare rāste andar kī jānib moḌ kar

manziloñ kā ik nishāñ bāhar banānā chāhiye

sochnā ye hai ki us kī justujū hone talak

saath apne ḳhud raheñ ham yā zamānā chāhiye

terī merī dāstāñ itnī zarūrī to nahīñ

duniyā ko kahne kī ḳhātir bas fasānā chāhiye

phuul kī pattī pe likkhūñ nazm jaisī ik duā

haath uThāne ke liye mujh ko bahānā chāhiye

vasl kī koī nishānī hijr ke bāham rahe

ab ke saada haath par mehñdī lagānā chāhiye

phuul ḳhushbū rañg jugnū raushnī ke vāste

ghar kī dīvāroñ meñ ik rauzan banānā chāhiye

shaam ko vāpas palaTte tā.eroñ ko dekh kar

sochtī huuñ lauT kar ab ghar bhī jaanā chāhiye

manzaron ke darmiyan manzar banana chahiye

rahnaward-e-shauq ko rasta dikhana chahiye

apne sare raste andar ki jaanib moD kar

manzilon ka ek nishan bahar banana chahiye

sochna ye hai ki us ki justuju hone talak

sath apne KHud rahen hum ya zamana chahiye

teri meri dastan itni zaruri to nahin

duniya ko kahne ki KHatir bas fasana chahiye

phul ki patti pe likkhun nazm jaisi ek dua

hath uThane ke liye mujh ko bahana chahiye

wasl ki koi nishani hijr ke baham rahe

ab ke sada hath par mehndi lagana chahiye

phul KHushbu rang jugnu raushni ke waste

ghar ki diwaron mein ek rauzan banana chahiye

sham ko wapas palaTte taeron ko dekh kar

sochti hun lauT kar ab ghar bhi jaana chahiye