manzil daraaz-o-dur hai aur hum mein dam nahin

manzil darāz-o-dūr hai aur ham meñ dam nahīñ

huuñ rail par savār to dām-o-diram nahīñ

maidān-e-zindagī meñ kareñ dauḌ-dhūp kyā

ham aise nā-tavāñ haiñ ki uThtā qadam nahīñ

kyā ḳhuub haath paañv ḳhudā ne 'atā kiye

chalte raheñ to hājat ḳhīl-o-ḳhadam nahīñ

aġhyār kyuuñ daḳhīl haiñ bazm-e-surūr meñ

maanā ki yaar kam haiñ par itne to kam nahīñ

jab tak hai ishq-o-āshiq-o-ma.ashūq meñ tamīz

khultā kisī pe rāz-e-hadūs-o-qidam nahīñ

aadam pe mo'tariz hoñ farishte to kyā ajab

chakhī hanūz chāshnī-e-zahr-e-ġham nahīñ

iz.hār-e-hāl kā bhī zarī'ā nahīñ rahā

dil itnā jal gayā hai ki āñkhoñ meñ nam nahīñ

tū hī nahīñ hai ramz-e-mohabbat se āshnā

varna dayār-e-husn meñ rasm-e-sitam nahīñ

irshād-e-tab.a kī na agar pairvī kare

naqqashi-e-ḳhayāl majāl-e-qalam nahīñ

sar hī ke bal ga.e haiñ sadā rahravān-e-ishq

hairat-zada na ban ki nishān-e-qadam nahīñ

kaisī talab kahāñ kī talab kis liye talab

ham haiñ to vo nahīñ hai jo vo hai to ham nahīñ

manzil daraaz-o-dur hai aur hum mein dam nahin

hun rail par sawar to dam-o-diram nahin

maidan-e-zindagi mein karen dauD-dhup kya

hum aise na-tawan hain ki uThta qadam nahin

kya KHub hath panw KHuda ne 'ata kiye

chalte rahen to hajat KHil-o-KHadam nahin

aghyar kyun daKHil hain bazm-e-surur mein

mana ki yar kam hain par itne to kam nahin

jab tak hai ishq-o-ashiq-o-mashuq mein tamiz

khulta kisi pe raaz-e-hadus-o-qidam nahin

aadam pe mo'tariz hon farishte to kya ajab

chakhi hanuz chashni-e-zahr-e-gham nahin

izhaar-e-haal ka bhi zari'a nahin raha

dil itna jal gaya hai ki aankhon mein nam nahin

tu hi nahin hai ramz-e-mohabbat se aashna

warna dayar-e-husn mein rasm-e-sitam nahin

irshad-e-taba ki na agar pairwi kare

naqqashi-e-KHayal majal-e-qalam nahin

sar hi ke bal gae hain sada rahrawan-e-ishq

hairat-zada na ban ki nishan-e-qadam nahin

kaisi talab kahan ki talab kis liye talab

hum hain to wo nahin hai jo wo hai to hum nahin