manzil-e-ishq ke rahbar kho gae

manzil-e-ishq ke rāhbar kho ga.e

mere hamdam mire ham-safar kho ga.e

inqilāb-e-zamāna ne karvaT jo lī

zikr ik do kā kyā ghar ke ghar kho ga.e

ho ga.ī ḳhatm rasm-e-mulāqāt bhī

vo nazāre vo shām-o-sahar kho ga.e

ham ne har gaam par saath chāhā magar

qāfile har na.e moḌ par kho ga.e

maiñ jo dāman meñ laayā thā aañsū tire

daaġh haiñ un ke la.al-o-gohar kho ga.e

baat ye raaz kī hai ki sab rāh-rau

rafta rafta har ik moḌ par kho ga.e

jab mukammal huī shams kī dāstāñ

maslahat hai ki ahl-e-nazar kho ga.e

manzil-e-ishq ke rahbar kho gae

mere hamdam mere ham-safar kho gae

inqilab-e-zamana ne karwaT jo li

zikr ek do ka kya ghar ke ghar kho gae

ho gai KHatm rasm-e-mulaqat bhi

wo nazare wo sham-o-sahar kho gae

hum ne har gam par sath chaha magar

qafile har nae moD par kho gae

main jo daman mein laya tha aansu tere

dagh hain un ke lal-o-gohar kho gae

baat ye raaz ki hai ki sab rah-rau

rafta rafta har ek moD par kho gae

jab mukammal hui shams ki dastan

maslahat hai ki ahl-e-nazar kho gae