manzil jo maine pai to shashdar bhi main hi tha

manzil jo maiñ ne paa.ī to shashdar bhī maiñ hī thā

vo is liye ki raah kā patthar bhī maiñ hī thā

shak ho chalā thā mujh ko ḳhud apnī hī zaat par

jhāñkā to apne ḳhol ke andar bhī maiñ hī thā

hoñge mire vajūd ke saa.e alag alag

varna barūn-e-dar bhī pas-e-dar bhī maiñ hī thā

pūchh us se jo ravāna hue kaaT kar mujhe

rāh-e-vafā meñ shāḳh-e-sanobar bhī maiñ hī thā

āsūda jis qadar vo huā mujh ko oḌh kar

kal raat us ke jism kī chādar bhī maiñ hī thā

mujh ko Darā rahī thī zamāne kī ham-sarī

dekhā to apne qad ke barābar bhī maiñ hī thā

ā.īna dekhne pe jo nādim huā 'qatīl'

mulk-e-zamīr kā vo sikandar bhī maiñ hī thā

manzil jo main ne pai to shashdar bhi main hi tha

wo is liye ki rah ka patthar bhi main hi tha

shak ho chala tha mujh ko KHud apni hi zat par

jhanka to apne KHol ke andar bhi main hi tha

honge mere wajud ke sae alag alag

warna barun-e-dar bhi pas-e-dar bhi main hi tha

puchh us se jo rawana hue kaT kar mujhe

rah-e-wafa mein shaKH-e-sanobar bhi main hi tha

aasuda jis qadar wo hua mujh ko oDh kar

kal raat us ke jism ki chadar bhi main hi tha

mujh ko Dara rahi thi zamane ki ham-sari

dekha to apne qad ke barabar bhi main hi tha

aaina dekhne pe jo nadim hua 'qatil'

mulk-e-zamir ka wo sikandar bhi main hi tha