منزلوں کے بعد دل اس راز کا محرم ہوا

منزلوں کے بعد دل اس راز کا محرم ہوا

در حقیقت وہ خوشی تھی نام جس کا غم ہوا

پیش آئینہ سنورنے میں بدل کر زاویے

تم نے جس عالم کو دیکھا اک الگ عالم ہوا

ان کے گیسو ہیں زمانہ پر مکمل تبصرہ

بارہا آراستہ ہو کر جہاں برہم ہوا

جذبۂ ہمدردیٔ الفت ترا مشکور ہوں

جب کسی کی آنکھ بھیگی میرا دامن نم ہوا

چشم ساقی سے گرا جاتا ہے ظرف مے کشاں

توڑ دیں ساغر جنہیں احساس بیش و کم ہوا

کتنے خاکے تھے حیات کامراں کے ذہن میں

دل تو اس عالم میں بھی مسرور تھا جب غم ہوا

شور تحسین سخن کی رو بہانے آئی تھی

زیب لب مانیؔ کے من آنم کہ من دانم ہوا